Ақсу ауданы Жансүгіров ауылының волейболшы қыздары Талдықорғанда өткен Ұлттық мектеп лигасында топ жарып, кезекті мәрте чемпион атанды. Жас спортшылар енді сәуір айында Астанада өтетін Қазақстан чемпионатында облыс абыройын қорғайды.
Облыс орталығындағы байрақты бәсекеде өңірдің ең таңдаулы 10 командасы бақ сынасты. Финалдық кездесуде Ақсу мен Панфилов аудан командалары бетпе-бет келді. Ойын алғашқы минуттардан-ақ тартысты басталды. Ақсулық спортшылар тор алдындағы шеберліктері мен жойқын соққыларының арқасында айласын асырып, қарсыластан басым түсті. Әсіресе, шешуші партияда есеп тең түсіп, тартыс қызған сәтте аруларымыз темірдей төзімділік танытты. Сәтті блоктар мен дәлме-дәл берілген пастар ойын тағдырын шешіп, Ақсу құрамасын алтын тұғырға көтерді.
Кез келген жеңістің артында білікті бапкердің еңбегі тұратыны анық. Команданың бас бапкері Сәкен Рафиков шәкірттерін тек физикалық тұрғыдан емес, психологиялық жағынан да шыңдай біледі. Команда құрамындағы тәжірибелі ойыншылар мен жас таланттардың сабақтастығы топтың болашағы зор екенін көрсетеді. Әсіресе, Нұрай Рахымбек секілді көшбасшылардың жойқын соққылары мен байсалды ойыны жанкүйерлердің ерекше ықыласына бөленіп жүр.
– «Бұл жеңіс – ұзақ уақыттық дайындық пен темірдей тәртіптің жемісі. Біздің мақсатымыз – тек сауатты әрі сапалы волейбол көрсету емес, жүйелі жаттығудың арқасында әр жарыстан жеңіспен оралу», – дейді бас бапкер Сәкен Нұрмұхамедұлы.
Команданың белді ойыншысы Айзере Қалибай алаңдағы тартыс пен алдағы жоспарлары туралы былай деді:
– «Біз тағы да чемпион атандық. Жетісу облысының намысын қорғау үшін Астана қаласына жолдама алдық. Жарыс басталған сәттен-ақ өз ойын өрнегімізді жүргізіп, қарсыласқа еркіндік бермедік. Шешуші сәттерде нағыз мінез көрсеттік. Блокта да, қорғаныста да қателікке жол бермей, әр мүмкіндікті ұпайға айналдырдық».
Айта кетейік, бұл команда өткен жылы да елді сүйіндірген еді. Олар Тимур Құлыбаевтың «Halyk» қайырымдылық қоры жүзеге асырып отырған «Auyl Sport» жобасында республика чемпионы атанды. Сол кезде еліміздің 17 облысынан жиналған үздік командаларды басып озып, ауыл спортының деңгейі биік екенін дәлелдеді. Ендігі кезекте қыздарды халықаралық деңгейдегі турнир күтіп тұр. Жансүгіров ауылында волейболдың осындай қарқынмен дамуы – халықтың салауатты өмір салтын берік ұстануының нәтижесі.
Чемпиондар ауылға оралғанда, Жансүгіров жұрты оларды зор қуанышпен қарсы алды. Жерлестері, ата-аналар мен ауыл ақсақалдары ақжарма тілектерін жеткізіп, спортшыларға батасын берді.
Арайлым Абылғазы
ЖУ 4-курс студенті
