Өскеменде әйелдер командалары арасында волейболдан ІІІ үлкен тур ойындары өтіп жатыр. Жарыстың екінші күні «Жетісу» волейбол клубы «Қарағанды» командасымен кездесіп, 3:0 (25:23, 25:22, 25:15) есебімен жеңді. Негізгі турдың екінші күні жетісулықтардың басты қарсыластары «Қуаныш» пен «Берел» өзара жолығып, турнирлік кестеде бір-бірінен ұзай түсті, – деп хабарлайды 7-su.kz ақпараттық порталы.
– «Қарағандымен» болған ойында жаттықтырушының тапсырмасын толық орындай алдық дей алмаймын, қателіктер болды. Әр ойын сайын өз қателігімізбен жұмыс істеп келеміз. Келесі ойында жақсы ойын көрсетуге барымызды саламыз. Енді алдымызда ІІІ үлкен турдың соңғы екі ойыны «Ақтөбе» және «Қуанышпен» болатын кездесу қалды. Жеңіске жеткіміз келеді, – деді өз сөзінде «Жетісу» волейбол клубының ойыншысы Валерия Якутина.
«Жетісу» сапынан «Қарағандымен» болған ойында ең үздік нәтиже көрсеткен – Мяо Ивэнь. Қытайлық қыз 26 соққының 20-сын қарсылас алаңына дөп түсірген. Одан кейінгі үздік көрсеткіш команда капитаны Кристина Аниконовамен (11 ұпай – 2 эйс, 5 шабуыл, 4 тосқауыл) Мария Фроловаға (11 ұпай – 2 эйс, 9 шабуыл) тиесілі.
Ал күннің басты ойыны «Қуанышпен» «Берел» арасында өтті. Теріскейліктер алаң иелерін 3:0 (25:21, 25:22, 25:17) нәтижесімен ұтты. Турнирлік кестеде әзірге «Жетісу» 19 ойыннан кейін 55 ұпаймен көш бастап келеді, одан кейін 51 ұпай жинаған «Қуаныш», үштікті 40 ұпаймен «Берел» командасы түйіндеп тұр.
