Су – тіршілік көзі. Елді мекеннің өркендеуі де, тұрғындардың тұрмыс сапасы да ең алдымен таза ауызсумен тікелей байланысты. Соңғы жылдары Мемлекет басшысының тапсырмасына сәйкес ауылдық аумақтардың инженерлік инфрақұрылымын жаңғыртуға айрықша мән беріліп келеді. Соның айқын көрінісінің бірі – Алакөл ауданына қарасты Лепсі ауылында жүзеге асырылып жатқан сумен жабдықтау жүйесін қайта жаңарту және салу жобасы.
Аталған құрылыс жұмыстары Алакөл ауданының тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің тапсырысы негізінде 2025 жылдан бері жүргізілуде. Жобаның басты мақсаты – ауыл тұрғындарын сапалы ауызсумен тұрақты қамтамасыз етіп, ескірген инфрақұрылымды заман талабына сай жаңарту.
Қазіргі таңда нысанда құрылыс қарқыны бәсеңдеген жоқ. Жобалық-сметалық құжаттамаға сәйкес қарастырылған 708 құдықтың бүгінге дейін 628-і орнатылды. Жалпы ұзындығы 35 шақырым болатын магистральдық су құбырының 34,9 шақырымына монтаждау жұмыстары толық аяқталған. Бұл – негізгі желінің басым бөлігі дайын деген сөз.
Сонымен қатар, ауызсу көзін тұрақты қамтамасыз ету үшін тереңдігі 226 метр болатын екі су ұңғымасы бұрғыланып, су резервуары мен сорғы стансысының ғимараты бой көтерді. Мұндай инженерлік нысандар жүйенің үздіксіз жұмыс істеуіне мүмкіндік береді.
Нысанда қауіпсіздік мәселесі де назардан тыс қалған жоқ. Өрттің алдын алу мақсатында әрбір құдыққа орнатылатын 135 гидранттың 100-і қойылды. Құрылыс алаңында 45 жұмысшы мен үш арнайы техника күн сайын еңбек етуде.
Жобаны жүзеге асырып жатқан мердігер – «Сапа құрылыс 2007» жауапкершілігі шектеулі серіктестігі. Компания өкілдерінің айтуынша, барлық жұмыс келісімшарт талаптарына сәйкес биылғы қыркүйек айында толық аяқталып, пайдалануға беріледі.
Мердігер мекеменің басшысының орынбасары Дәурен Жүнісовтің сөзінше, құрылыс екі жылға жоспарланғандықтан, жұмыс кестесі өңірдің климаттық ерекшеліктері ескеріле отырып түзілген.
– Лепсі ауылында шамамен 35 шақырым су құбырын жүргізу жұмыстарын атқарып жатырмыз. Өткен жылы негізгі желінің небәрі 150 метрі ғана аяқталмай қалған еді. Қазіргі уақытта 420 үйдің 210-ына су желісі тартылды. Бұдан бөлек, өз бастамамызбен әлеуметтік жағдайы төмен отбасылардың 30-ға жуығының үйіне дейін суды тегін кіргізіп береміз. Осы айдың соңына дейін барлық тұрғын үйді су жүйесіне қосып, қыркүйекте жобаны толық аяқтауды жоспарлап отырмыз. Нысанға 2,5 миллиард теңге қаржы бөлінді, – дейді ол.
Инфрақұрылымдық жобаның ауыл тұрғындары үшін маңызы зор. Өйткені бұл өзгеріс тек ауызсу мәселесін шешіп қана қоймай, халықтың тұрмысын жеңілдетіп, ауылдың келешегіне деген сенімді нығайтады.
Лепсі ауылының тұрғыны, ауылдық ардагерлер кеңесінің төрағасы Жезтай Төшкенова бұл жаңалықты көптен күткен қуаныш деп бағалайды.
– Осы ауылға көшіп келгенімізге 44 жыл болды. Медицина саласында 45 жылға жуық еңбек еттім. Сондықтан елді мекеннің кешегісі мен бүгінгісін жақсы білемін. Осы уақытқа дейін суды құдықтан тасып іштік. Су – тіршіліктің нәрі. Әсіресе ауыл адамдары үшін оның орны ерекше. Бақшамызды баптаймыз, мал ұстаймыз. Сондықтан жаңа су жүйесінің іске қосылуын асыға күтіп отырмыз. Мердігерлер жұмысты уақытында аяқтаса деген тілегіміз бар. Алайда ауылдан жастардың көшіп жатқаны қынжылтады. Себебі жұмыс та, мүмкіндік те аз. Соған қарамастан туған жерге деген сүйіспеншілік бізді осында ұстап отыр. Ендігі үміт – осы басталған істің сәтімен аяқталуында, – дейді ауыл тұрғыны.
Расында, ауызсу мәселесінің оң шешілуі – елді мекеннің ертеңіне салынған инвестиция. Таза су – денсаулықтың кепілі, ауыл шаруашылығының тірегі әрі тұрғындардың өмір сапасын айқындайтын негізгі көрсеткіштердің бірі. Лепсіде жүзеге асып жатқан ауқымды жоба толық аяқталған кезде жүздеген отбасының тұрмысы жеңілдеп, ауылдың әлеуметтік келбеті жаңа деңгейге көтерілмек. Бұл, әрине, мемлекет қолдауы мен ел еңбегінің тоғысқан тұсы, халық игілігіне бағытталған нақты істің нәтижесі.
Санжар СҰЛТАНҒАЗЫ
