Қазақстандық кәсіпқой боксшы Мейірім Нұрсұлтанов орта салмақта WBC нұсқасы бойынша әлем чемпионы атағына барар жолдағы ең басты жекпе-жегіне жақындады. Биыл 19 қыркүйекте АҚШ-тың Сан-Диего қаласында өтетін бокс кешінде ол WBC ұйымының уақытша чемпионы, америкалық Хесус Рамоспен кездеседі. Дүниежүзілік бокс кеңесінің (WBC) президенті Маурисио Сулейман ресми түрде хабарлағандай, бұл кездесу толыққанды чемпиондық белбеуге үміткерді анықтайтын жекпе-жек болмақ.
Boxingscene басылымының мәліметінше, жеңіске жеткен боксшы келесі кездесуінде орта салмақтағы WBC тұжырымының толыққанды чемпионы, доминикандық Карлос Адамеспен жұдырықтасуға міндетті болады. Бұл Мейірім үшін кәсіпқой шаршы алаңдағы ең жауапты әрі шешуші сәттердің бірі екені сөзсіз.
Отандық спортшының рингке оралуы да ерекше назар аудартады. Ол соңғы рет шаршы алаңға 2023 жылы шығып, содан бері үзіліс алған. Соған қарамастан Нұрсұлтанов өзінің жоғары шеберлігі мен бұған дейінгі жеңістерінің арқасында WBC рейтингінде орта салмақ дәрежесі бойынша көш басындағы №1 үміткер мәртебесін сақтап қалды. Сондықтан Сан-Диегодағы жекпе-жек Мейірімнің бабы мен бағын сарапқа салатын үлкен сынақ болғалы тұр. Егер жерлесіміз бұл бәсекеде басым түссе, Карлос Адамеспен өтетін жекпе-жекте Қазақстан қоржынына кезекті әлемдік чемпиондық белбеуді сыйлайды.
Серік ҚАНТАЙ
