Өткен жылдан бастап жалпыға бірдей декларациялау қағидаты өзгеруіне байланысты, төртінші кезеңдегі азаматтар (шетелде мүлкі жоқтар) декларация тапсырудан босатылды. Осыған орай, «кіріс» немесе «бастапқы» 250-форма мен жыл сайынғы 270-формалар сұралмайды. Бұл жөнінде Бейсен Құранбек атындағы Журналистер үйіне арнайы келіп, журналистермен кездескен Жетісу облысы бойынша Мемлекеттік кірістер департаментінің өндірістік емес төлемдер басқармасының басшысы Гүлмира Бейсекбай мен бас маман Жанар Тиесова айтты.
2026 жылы физикалық тұлғалар үшін екі салықтық есептілік формасы:
-
250.00-форма (Активтер мен міндеттемелер туралы декларация): Оны жеке тұлғалар (жемқорлыққа қарсы заңдар субъектілері, шетелде мүлкі/активтері/шоттары барлар, цифрлық активтері барлар және жеке практикамен айналысатындар) биыл 15 қыркүйекке дейін тапсырады.
-
270.00-форма (Кірістер мен мүлік туралы декларация): Оны 2025 жылы табыс тапқан, шетелде шоттары немесе мүлкі бар, ірі кәсіпорын басшылары/құрылтайшылары, сондай-ақ жұмыс берушіге 2025 жылы салық шегерімдерін қолдану туралы өтніш берген азаматтар келесі жылдың 15 қыркүйегіне дейін тапсыруға міндетті.
Егер жұмыскер 2025 жылы жұмыс берушіге (салық агентіне) оқу, емдеу немесе ипотека сияқты «өзге де салық шегерімдерін» қолдану үшін алдын ала сомаға (282 АЕК-ке дейін) өтініш беріп, оны пайдаланған болса, онда міндетті түрде 2026 жылдың 15 қыркүйегіне дейін 270-форманы тапсырып, құжаттармен растауы тиіс. Егер жұмыс берушіге жүгінбеген болсаңыз, растайтын құжаттар болған жағдайда шегерімдерді ескі заңнама талаптары шеңберінде өз бетінше қолдануға құқығыңыз бар. Ұсынылған түсіндірмелерге сәйкес, салық агенті арқылы қолданылатын өзге де салықтық шегерімдердің алдын ала сомасы күнтізбелік жыл ішінде айлық есептік көрсеткіштің 282 АЕК еселенген мөлшерінен аспауға тиіс. Кейіннен мәлімделген шегерімдер декларацияны ұсыну кезінде тиісті құжаттармен расталуы қажет. 2026 жылдан бастап барлық шегерімдер бірыңғай базалық салық шегеріміне көшеді.
«Жетісу-Ақпарат»
