Адам өміріндегі ең үлкен байлық – денсаулықты сақтау тек медицина қызметкерлерінің ғана емес, әр азаматтың өз жауапкершілігі. Көптеген аурудың алдын алуға болады. Ол үшін қарапайым, бірақ маңызды қағидаларды ұстану қажет.
Тәжірибеде байқап жүргеніміздей, сырқаттанудың негізгі себебі – өмір сүру салтын дұрыс ұстанбау. Қозғалыстың аздығы, дұрыс тамақтанбау, ұйқы режимінің бұзылуы, күйзеліс пен зиянды әдеттер адам ағзасының қорғаныс қабілетін әлсіретеді. Соның салдарынан жүрек-қан тамырлары аурулары, қант диабеті, артық салмақ және басқа да созылмалы дерттер көбейіп келеді. Аурудың алдын алудың ең басты қағидасы – салауатты өмір салтын ұстану. Күн сайын таза ауада серуендеу, көкөніс пен жеміс-жидекті көбірек тұтыну, майлы және тұзды тағамдарды шектеу денсаулықты нығайтады.
Сонымен қатар тәулігіне кемінде 7-8 сағат ұйықтау ағзаның қалыпты жұмыс істеуіне көмектеседі. Көп жағдайда адамдар дәрігерге немесе медицина қызметкеріне ауру асқынған кезде ғана жүгінеді. Бұл – үлкен қателік. Уақытылы профилактикалық тексеруден өтіп тұру көптеген ауруды ерте анықтауға мүмкіндік береді. Ерте анықталған дерттің емі де жеңіл әрі нәтижелі болады. Жұқпалы аурулардың алдын алу үшін жеке бас гигиенасын сақтау өте маңызды. Қолды жиі жуу, таза су пайдалану, тұрмыстық тазалықты сақтау және вакцинациядан уақытылы өту – денсаулық кепілі. Сондай-ақ қазіргі қоғамда күйзеліс те денсаулыққа кері әсер ететін негізгі факторлардың біріне айналды. Үнемі мазасыздық пен шаршау иммунитеттің төмендеуіне әкеледі. Сондықтан жақсы көңіл-күйді сақтап, демалысқа уақыт бөліп, жақын адамдармен көбірек араласқан жөн.
Фельдшер ретінде тұрғындарға айтарым, ауруды емдегеннен гөрі оның алдын алған әлдеқайда тиімді. Денсаулыққа бүгін көңіл бөлсек, ертең көптеген қиындықтың алдын аламыз. Әр адам өз денсаулығына жауапкершілікпен қарап, профилактикалық тексерулерден уақытылы өтіп тұрса, қоғамның да денсаулығы нығая түседі.
Денсаулық – сатып алуға болмайтын қазына. Оны сақтау үшін қарапайым қағидаларды күнделікті өмір салтына айналдырайық.
Самал Дулатбаева,
фельдшер
Талдықорған қаласы
