Қазақстанның Денсаулық сақтау министрлігі мемлекет тарапынан азаматтарға тегін берілуі тиіс дәрі-дәрмектердің дәріхана сөрелерінде заңсыз сатылып жатқанын әшкереледі. Кепілдендірілген тегін медициналық көмек көлеміне арналған препараттардың жекеменшік дәріхана желілеріне қалай түскені қазір құзырлы органдар тарапынан тексеріліп жатыр, – деп хабарлайды 7-su.kz ақпараттық порталы.
Ресми деректерге сүйенсек, 2024 жылдың 1 шілдесінен бастап еліміздегі дәріханаларда тегін берілуі тиіс 4114 дәрі түрінің саудаланғаны тіркелген. Бұл – мемлекеттік бюджет есебінен науқастарға үлестірілуі керек нысаналы көмектің мақсатсыз жұмсалуының айқын көрінісі.
Қалыптасқан жағдайға байланысты министрлік мамандары 74 нысанда жоспардан тыс тексеру жүргізді. Тексеру қорытындысы бойынша:
-
31 медициналық ұйым әкімшілік жауапкершілікке тартылды;
-
Заңбұзушылық жасаған нысандарға жалпы сомасы 12,3 млн теңге айыппұл салынды;
-
43 мекемеге кемшіліктерді шұғыл жою туралы нұсқама берілді.
Цифрлық бақылау платформасының аналитикасы таңбалау жүйесіндегі өрескел ақауларды да көрсетіп берді. Мәселен, бір таңбалау кодын әртүрлі тараптардың қолдануы бойынша 480 752 факт тіркелген. Бұл – бір дәрінің қағаз жүзінде бірнеше рет «өткізілгенін» немесе заңсыз айналымға түскенін білдіретін көрсеткіш.
Бұл мәселенің шешімі ретінде Денсаулық сақтау министрлігі дәрі-дәрмекті қадағалаудың жаңа цифрлық тетіктерін енгізуде. Енді әрбір дәрінің қоймадан науқастың қолына жеткенге дейінгі жолы онлайн режимде бақыланады. Бұл жүйе ашықтықты қамтамасыз етіп, мемлекет қаржысының талан-таражға түсуіне тосқауыл қоюы тиіс.
Қазіргі таңда барлық жинақталған материалдар Қаржылық мониторинг агенттігі мен Сыбайлас жемқорлыққа қарсы іс-қимыл агенттігіне жолданды. Заңсыздықты ұйымдастырған тұлғаларға қатысты қылмыстық іс қозғалуы мүмкін.
