Алакөл ауданында «Ауылда денсаулық сақтауды жаңғырту» ұлттық жобасы қарқынды жүзеге асуда. Қазір мұнда 9 медициналық нысан бой көтеруде.
Екпінді, Жайпақ және Бескөл ауылдарында дәрігерлік амбулаторияның құрылысы жүріп жатыр. Сонымен қатар, Жанама, Сапақ, Үшбұлақ, Қызылқайың, Ақжар және Қайнар елді мекенінде фельдшерлік-акушерлік пункттер бой көтеруде. Қазір Ақжар ауылындағы медициналық нысан 40 пайызға даяр. Мердігер «Дәулет» ЖШС-нің құрылыс бастығы Құрбанәлі Омаровтың сөзінше, нысан құрылысы уақытында аяқталады. Нысан құрылысына 182 млн. теңге қаралған. 240 шаршы метр болатын фельдшерлік-акушерлік пункт толықтай қараша айының аяғында қолданысқа беріледі. Айтпақшы, осы серіктестік Жетісу өңірінде 4 нысанның құрылысын жүргізуде.
– Құрылыс жұмыстары тамыз айында басталды. Қазір қарқынды еңбектенудеміз. Жергілікті 10 тұрғынды жұмыспен қамтып отырмыз. Жалақылары 300 мың теңгенің шамасында. Одан өзге мамандарымыз вахталық әдіспен жұмыс істеуде. 20 сотық жерде орналасқан фельдшерлік акушерлік пункттің медициналық жабдықтарын сатып алдық. Құны 35 млн. теңгенің жабдықтары қазір Алматы қаласында тұр. Құрылыс жұмыстарын мерзімінде аяқтауға мүмкіндігіміз толық жетеді, – дейді «Дәулет» ЖШС өкілі.
Ақжар ауылында ескі фельдшерлік-акушерлік пункт 60-жылдарда салынған. Қазіргі күйі тіптен, сыны кеткен. Дейтұрғанмен 1500 адам сол нысанда ем-дом қабылдап келді. Ауылдық округ әкімі Елес Жапарғалиевтің айтуынша, қыста суық әрі талаптар мен нормаларға сәйкес келмейтін нысанның жайы көптен сөз болып жүріпті.
– Ауыл тұрғындары жаңа медициналық нысан салынып жатқанына қуанышты. Ауылдық округке қарасты Қоңыр ауылында шілде айында блокты-модульді медициналық пункт пайдалануға берілді. Ауылдағы ағайынның сапалы өмір сүруі үшін бар жағдай жасалуда. Былтыр 150 орынды мәдениет үйі пайдалануға беріліп, ауыл мектебі жаңғыртудан өтті, – деді ауыл әкімі.
Облыстық денсаулық сақтау басқармасының басшысы Арман Жансеңгіровтың айтуынша, ауылдағы тұрғындардың медициналық қызметке қолжетімділігін арттыруда блокты-модульді медициналық нысандардың көптеп салынуы үлкен маңызға ие.
– Алакөл ауданында былтыр Қарлығаш, Байзерек және Ынталы ауылдарында блокты-модульді медициналық пункттер салынды. Биыл Бибақан, Арқарлы және Қоңыр елді мекендерінің тұрғындары мұндай нысанға қол жеткізді. Тұрғындарды сапалы медициналық қызметпен қамту мақсатында Достық, Қабанбай, Ақтүбек ауылдарына 3 санитарлық автокөлік алынды. Жыл соңына дейін аудандық аурухананы заманауи медициналық жабдықтармен қамтамасыз ету жоспарланған. Алакөл ауданында 200 төсектік стационары бар орталық емхана құрылысы да жоспарланып, жобалық-сметалық құжаттары әзірленуде, – дейді облыстың бас дәрігері.
Жалпы, қазір Жетісу өңірінде 59 медициналық нысанның құрылысы жүргізілуде. Аудандар мен 2 қаланы қоса алғанда 17 дәрігерлік амбулатория, 39 фельдшерлік-акушерлік пункт, 5 медициналық пунктің іргесі қалануда.
Дастанбек САДЫҚ
Фото: Жеңіс Ысқабай
