Халқымыз ертеден жан мен тәннің саулығын басты орынға қойған. Сол себепті «Бірінші байлық – денсаулық» деген. Тұрғындардың денсаулығы – еліміздің белсенді дамуына, экономикасына, әсіресе әлеуметтік жағдайының жақсаруына ықпал ететіні сөзсіз. Осы тұрғыда аймағымыз соңғы жылдары әлеуметтік-экономикалық жағынан көптеген жетістіктерге жетіп келеді.
Жуырда ауданның денсаулық сақтау саласына жаңа автокөліктер келді дегенді естіп өңірдің бас дәрігері Алтай Шұлғаубаевқа жолықтық. Алтай Кәмиұлының сөзінше, қажетті құрал-жабдықтармен қамтамасыз етілген автокөліктер Черкасск, Лепсі, Қарабөгет ауылдарына, Сарқан қаласына берілген. Көліктер халықтың санына, орналасу ретіне қарай бөлінеді. Былтыр 3 автокөлік қолданысқа берілді. Осылайша денсаулық сақтау саласының автопаркі 85 пайызға жаңартылды. Белгіленген нормативке сай санитарлық автокөліктер әрбір 7-8 жыл сайын ауыстырылу керек. Ендігі алда тұрған басты міндет – Екіаша, Бақалы, Алмалы ауылдарындағы автокөліктерді жаңасына ауыстыру.
Алтай Кәмиұлы ауданның денсаулық сақтау саласына биылғы жылы 4 маман келгенін, оларды баспанамен қамту өзекті мәселеге айналғанын жеткізді. 1 дәрігердің үйі болмағандықтан ауруханада тұрып жатқанын жеткізді. Денсаулық сақтау саласына мамандар жетіспеушілігі сезіліп тұрғанда тұрақты баспанамен қамтылмаса кетіп те қалатынын айтты. Бас дәрігер «Жас мамандар келіп жатыр, бірақ оларды үймен қамту өзекті әрі бас ауыртатын мәселе» дегенді қынжыла мәлімдеді.
Басқа ауылдармен қатар жаңа автокөлік алып, біртіндеп мәселесі шешіле бастаған Черкасск ауылдық дәрігерлік амбулаториясының меңгерушісі Сәлима Өтеулинованы әңгімеге тарттық.
– Өте қуаныштымыз, Аллаға шексіз шүкір, жаңа автокөлік алып тұрмыз. Черкасск ауылдық округінде 5 ауыл бар, тұрғындардың саны 2840. Бұрын ескі көлігіміз болған. Жаңа көлікті бірінші рет алып тұрмыз. Қуанышымызда шек жоқ, ауданның бас дәрігеріне көп рахмет, – дейді Сәлима Закарияқызы.
Денсаулық сақтау саласы үшін халыққа сапалы медициналық қызмет көрсету – басты міндет. Сол басты міндеттерін ұмытпай, адам жанының арашасы болып жүрген ақ халатты абзал жандардың орны ерекше. Сол себепті де оларға жан-жақты қолдау жасала берсін деп тілейік.
Жақсылық ЖОМАРТҰЛЫ
Сарқан ауданы
