Кәсіби коуч, халықаралық дәрежедегі парапсихолог және дінтанушы Айнұр Әбдірәсілқызы Qasqa Jol YouTube арнасының жаңа шығарылымында медицинаның мүмкіндігі жетпейтін кейбір ауруларды дем салу арқылы емдеу жайында және зікір айтудың ережелері туралы әңгімеледі.
— Бұл салада жүргеніме отыз бес жыл болды. Өзімнің тегім туралы бұған дейін де айтып өткенмін: қырық бір атам хан болған, қырық бір нағашым әулие болған. Сондықтан мен үшін бұл қасиеттердің берілуі заңды құбылыс деп білемін. Алайда тек тектілікке сеніп қоймай, үздіксіз ізденіс арқылы да осы дәрежеге жеттім, — деді Айнұр Әбдірәсілқызы.
Ол зікір айту ұғымының кең екенін түсіндірді:
— Зікір тек арнайы отырыстарда жасалатын әрекет емес. Біздің намаз оқуымыз, истиғфар айтуымыз, салауат айтуымыз, тіпті «Лә илләһә иллә Алла» деп жүріп айтуымыздың өзі зікірге жатады. Алла Тағаланы әр сәтте еске алу – нағыз зікірдің белгісі, — деді дінтанушы.
Айнұр Әбдірәсілқызы Алланың 99 көркем есімін зікір ету арқылы адамның мұқтаждығының шешімін сұрауға болатынын да айтты. Мысалы, ризық-несібе сұрау қажет болса, «Әл-Раззақ» деп зікір айтуға кеңес берді.
Жалған емшілерге сенбеңіз
Дінтанушы бүгінгі қоғамда жалған емшіліктің көбейіп кеткенін атап өтті:
— Қазір халық ненің дұрыс, ненің бұрыс екенін ажырата алмай қалды. Діннің атын жамылып, сап-сау адамға «сенде жын бар» деп алдайтындар көбейді. «Ду шығарушы» атын жамылып, түрлі тәсілдермен адастыратындар бар. Бұған сене беруге болмайды. Ислам мойындаған, дәстүрлі және дәлелді емдеу тәсілдерін ғана қабылдау керек, — деп ескертті ол.
Айнұр Әбдірәсілқызы исламның медицинаны жоққа шығармайтынын да ерекше атап өтті:
— Кей адамдар әдейі арандату үшін медицинаға қарсы пікірлер таратып жүр. Бірақ ислам діні ғылымды қолдайды. Медицина да, шариғат рұқсат еткен емшілік те қатар жүруі керек, — деді дінтанушы.
Фото: видеодан алынған кадр
