Қазақстан Республикасы Ұлттық экономика министрлігі Бәсекелестікті қорғау және дамыту комитетінің Алматы облысы бойынша департаментіне «Алма» жеке кәсіпкерлігіне қарасты жанармай бекетінде автокөлікке құю үшін сұйытылған мұнай газының бағасы қымбаттығына қатысты өтініш түскен болатын.
Осыған орай арнайы тексеру жүргізген департамент мамандары автогаздың бір литрінің бағасы 75 теңге тұратынын анықтады.
Кәсіпкердің бұл іс-әрекеті еліміздің бәсекелестікті қорғау саласындағы заңнамасын және ҚР Энергетика және Ұлттық экономика министрлігінің биылғы 3 сәуірдегі автогаз құю бекетінде автокөлікке құю үшін сұйытылған мұнай газын бөлшек саудада өткізуге шекті бағаларды белгілеу туралы бірлескен бұйрығын бұзып отырғанын жеткізді.
Өйткені, бірлескен бұйрықта сығымдалған газдың Алматы облысындағы шекті бағасы 70 теңге болуы тиістігі анық жазылған. Осыған байланысты департамент мамандары кәсіпкердің тұрғылықты мекенжайына Қазақстан Республикасы бәсекелестікті қорғау саласындағы заңнаманың бұзылуын тоқтату туралы нұсқама жіберген болатын.
Қазір нұсқама талабы орындалып, автогаз бағасы 70 теңгеге арзандатылғаны белгілі болып отыр.
«ЖЕТІСУ-АҚПАРАТ»
Сурет — ғаламтордан
