Төрт жылдан бері елімізде 4 пайыздық автонесие бағдарламасы атқарылып келеді. Алайда жыл сайын екінші деңгейлі банктер бюджеттен қосымша қаржы күтіп отырады. Соның есебінен автонесиелер жеңілдікпен беріледі. Осыған байланысты «Қазақпарат» тілшісі бірнеше автосалонға xабарласып, мән-жайды анықтап көрді.
Астанадағы «Бипэк-Авто» салонының менеджерлері биыл 4 пайыздық автонесиелерді беруді әлі бастамағанын жеткізді. Олардың айтуынша, аталған бағдарлама бойынша қосымша қаражат бөлінуі керек. Сол кезде автонесиелерді беруге болады.
«Иә, біз қаржыландыруды күтіп отырмыз. Қашан берілетіні белгісіз. Бірақ қосымша ақша түскеннің өзінде бір айдан бір жылға дейін күтуге тура келеді. Себебі, бізде біраз өтініш жиналып қалды, кезекте тұрған адамдар көп. Сосын 10 пайыздан басталатын алғашқы жарнаны құю қажет», — дейді мамандар.
«Аллюр Авто» салонында отырған банк қызметкерлері аталған ақпаратты растады. Менеджердің сөзіне қарағанда, қосымша қаражат наурыз-сәуір айларында түсіп қалуы мүмкін. Сонда 4 пайыздық автонесиелерді беру шаралары басталады. «Енді, былтыр қосымша қаражат наурыз-сәуір айларында бөлінген еді. Биыл да солай болатын шығар. Бірақ былтыр ақша тез таусылып қалды. Себебі, 2017 жылы мұндай автонесиелер берілген жоқ. Содан адамның кезегі көп болды да, қосымша қаржы жылдам таралып бітті. Осы жылы қалай болатыны белгісіз. Бірақ 10 пайыздық алғашқы жарнаны салып, өтінішті беріп кетсеңіз болады. Бәлкім, биыл ілігіп қаларсыз», — деді банк қызметкерлері.
Бұған дейін «Қазақпарат» тілшісіне сұxбат берген Қазақстанның автобизнес қауымдастығының басшылығы да 4 пайыздық автонесие бағдарламасына қосымша қаражаттың қажеттігін жеткізді. Ұйымның вице-президенті Анар Мақашеваның айтуынша, жеке тұлғаларға бұл автонесие 2-3 жылға беріледі. Оны алғашқы жарнамен де, жарнасыз да алуға мүмкіндік бар.
— Бүгінде осы бағдарлама бойынша айналымда жүрген қаржының сомасы 34 миллиард теңгені құрайды. Ол — қайтарымды ақша. Бұл дегеніміз — несие алған адам ай сайын төлем жасағанда ол ақша қайтадан айналымға түседі, тағы бір адам автонесие рәсімдей алады. Аталған бағдарлама 20 жылға есептелген. Бұл — өте табысты бастама. Дегенмен, биыл Үкімет тарапынан қосымша 10 миллиард теңге бөлінеді деген үмітіміз бар, — деді А.Мақашева.
Айта кетейік, жақында ҚР Президенті төрағалығымен өткен Үкіметтің кеңейтілген мәжілісінде Ұлттық банк «7-20-25» бағдарламасымен автонесие беруді ұсынды. Мемлекет басшысы аталған бастаманы қолдады. Үкіметтің соңғы отырысында ҚР Ұлттық банкі төрағасы Данияр Ақышев жаңа бағдарламаның қашан іске қосылатынын айтты. «7-20-25» бағдарламасы сияқты біз халықтың отандық автомобильді сатып алуына кредит беру бағдарламасын әзірлеуге дайынбыз. Бұл үшін жұмысты мемлекеттік органдар және банктермен бірінші жартыжылдықта пысықтаймыз. Бағдарламаны екінші жартыжылдықта іске қосуға дайынбыз», — деп атап көрсетті Данияр Ақышев.
«ҚАЗАҚПАРАТ»
