ҚР Премьер-Министрі Асқар МАМИННІҢ төрағалығымен 2020-2025 жылдарға арналған «Нұрлы жол» бағдарламасы аясында автожол саласын дамыту жөнінде кеңес өтті. Селекторлық режімде өткен жиынға облыс әкімі Амандық БАТАЛОВ, облыс әкімінің орынбасарлары, басқарма басшылары және мердігерлік ұйымдардың өкілдері қатысты.
Кеңесте автожол саласындағы құрылыс маусымына дайындық, битуммен қамтамасыз ету жағдайы, еңбекті қорғау және қауіпсіздік техникасын қамтамасыз ету шаралары бойынша, сондай-ақ, шетелдік жұмыс күшін тартуға квота беру, табиғатты қорғау шараларының сақталуы туралы осы салаға жауапты министрлер баяндама жасады. 2019 жылы республикалық маңызы бар 4,4 мың шақырым автожол салынып, реконструкцияланды. Жыл қорытындысы бойынша 641 шақырым жолда қозғалыс ашылды. 1,1 мың шақырым республикалық маңызы бар және 3,5 мың шақырым жергілікті желілердегі автожолға күрделі және орташа жөндеу жұмыстары жүргізілді.
Автожол саласының 2020 жылға арналған бюджеті 750 млрд. теңгені құрайды, республикалық және жергілікті маңызы бар 9,8 мың шақырым автожол жөндеу жұмыстарымен қамтылады. Жыл қорытындысы бойынша жалпы ұзындығы 2,6 мың шақырым автожол учаскелерінде қозғалысты ашу жоспарлануда, соның ішінде Талдықорған – Өскемен (763 км), Қарағанды – Балқаш – Қапшағай (645 км), Қалбатау – Майқапшағай (415 км), Меркі – Бурылбайтал (266 км), Ақтөбе – Атырау – Астрахань (279 км) және тағы басқалары бар.
– Биыл автомобиль жолдарын салу бойынша ауқымды жұмыс көлемін атқару қажет. Алға қойылған міндеттерді уақытылы әрі сапалы орындау және жыл соңына дейін автомобиль жолдарын жаңғыртудың негізгі жобалары бойынша қозғалысты қамтамасыз ету мақсатында құрылыс маусымына алдын ала дайындалу керек, – деді Үкімет басшысы Асқар Мамин.
Жергілікті жұмысшы кадрларды даярлау туралы Алматы, Шығыс Қазақстан, Қарағанды, Жамбыл облыстарының әкімдері мен автожол жобаларының іске асырылу барысы туралы мердігерлік ұйымдар мен «ҚазАвтоЖол» ҰК» АҚ өкілдері жеке-жеке баяндады.
Алматы облысында іске асып жатқан жобаларды сөз еткен облыс әкімі Амандық Баталов:
– 2019 жылы «Нұрлы жол» бағдарламасы бойынша 51,4 миллиард теңге бөлінді. Аймақта 18 жоба іске асырылуда, оның бесеуі ірі. Осыған орай Индустрия және инфрақұрылымдық даму министрлігімен бірлесіп, ауыл тұрғындарынан 140 адамды кран жүргізуші, газбен, электрмен дәнекерлеуші, тракторшы-машинист сынды 9 мамандық бойынша оқыттық. Биыл 10 мамандық бойынша 158 адам даярлықтан өтеді. Құрылыс маусымы басталғанға дейін қажетті 293 білікті маманды оқытып жұмысқа дайындаймыз, – деп туризм нысандарына апаратын ауыларалық жолдарға ерекше назар аударылғанын баяндады.
Амандық Ғаббасұлы осы мақсатта 4,1 миллиард теңге бөлінгендігін, ағымдағы жылы 26,4 миллиард теңгеге тағы 508 шақырым жолды жөндеу жоспарланғанын айтты. Сөз соңында республикалық маңызы бар Талдықорған – Өскемен, Үшарал – Достық сынды автожол құрылысына бақылау жүргізіп, «Нұрлы жол» бағдарламасы аясында қолға алынған жобалардың нәтижелі іске асырылатынын жеткізді.
Мәулен ӘНЕРБАЙ
Алматы облысы
