Қазақстанда азық-түлік өндірісі биылғы жылдың алғашқы айларында айтарлықтай серпін көрсетті. 2026 жылдың қаңтар-ақпан кезеңінде саладағы жалпы өнім көлемі 665 миллиард теңгеден асып, өткен жылдың осы мерзімімен салыстырғанда 11,9 пайызға артты. Бұл көрсеткіш бастапқыда жоспарланған 4,3 пайыздық межеден әлдеқайда жоғарылаған, – деп хабарлайды 7-su.kz ақпараттық порталы.
Сала құрылымына көз жүгіртсек, негізгі азық-түлік түрлерінің басым бөлігінде оң өзгеріс байқалады.
Әсіресе, сары май өндірісі ерекше қарқынмен өсіп, бірден 56,5 пайызға ұлғайған. Нәтижесінде өндіріс көлемі 8,1 мың тоннаға жеткен. Сонымен қатар ірімшік пен сүзбе өндірісі 39,2 пайызға артса, қант және шоколад қосылған кондитерлік өнімдер 21,4 пайызға көбейген. Жарма өндірісі де 20,8 пайыздық өсіммен ерекшеленіп отыр.
Ет өнімдері сегментінде де тұрақты динамика сақталған. Ет консервілерін өндіру 12,9 пайызға артқан. Ірі қара, шошқа, қой, ешкі және жылқы етін өндіру көлемі 6,9 пайызға өскен. Шұжық өнімдері 6 пайызға, өсімдік майы 12,3 пайызға көбейген. Ал өңделген және консервіленген жеміс-көкөніс өнімдері 13,4 пайызға ұлғайған.
Сүт және ұн өнімдері бағытында да ілгерілеу бар. Өңделген сүт өндірісі 1,6 пайызға өссе, қышқыл сүт өнімдері 3,5 пайызға артқан. Ұн өндірісі 11,9 пайызға, ұннан жасалған кондитерлік өнімдер 5,2 пайызға, макарон өнімдері 8,1 пайызға көбейген.
Сусындар өндірісі де назар аударарлық деңгейде дамып келеді. Жалпы көлемі 175,4 миллиард теңгені құрап, 10,2 пайыздық өсім көрсеткен. Әсіресе алкогольсіз сусындар өндірісі айрықша қарқын алып, бір жыл ішінде 43,7 пайызға ұлғайып, 564,3 миллион литрге жеткен. Өткен жылы бұл көрсеткіш 392,7 миллион литр болған еді.
Жалпы алғанда, келтірілген деректер еліміздің агроөнеркәсіп кешенінде тұрақтылықтың сақталғанын аңғартады. Өндіріс көлемінің артуы ішкі нарықты қамтамасыз ету мүмкіндігін кеңейтіп, азық-түлік қауіпсіздігін нығайтуға бағытталған жүйелі жұмыстың нәтижесін көрсетіп отыр
