Бүгін Алматы облысының әкімі Амандық БАТАЛОВТЫҢ төрағалығымен аймақта құрылған дағдарысқа қарсы жедел штабтың бірінші отырысы өтті. Жиында ел Үкіметінің дағдарысқа қарсы іс-шаралар жоспарын өңірде жүзеге асырудың негізгі бағыттары айқындалды. Бұл туралы Алматы облысы әкімінің баспасөз қызметі хабарлады.
Жиында аймақ басшысы дағдарысқа қарсы шаралар қабылдау мен оларды жүзеге асыруды Елбасы мен Президент өз бақылауларына алғанын атап өтті. Үкіметте арнайы штаб құрылып, оның іс-шаралар жоспары әзірленгенін айтты. Соған орай орай облыста да осындай штаб жұмыс істейтін болады. Амандық Баталовтың тапсырмасымен алдағы екі күнде оның іс-жоспары айқындалмақ.
Штаб жұмысын облыс әкімі Амандық Баталов басқарады. Жұмыс тобының құрамына облыс әкімінің орынбасарлары, облыстық басқарма, департамент басшылары, аудан, қала әкімдері, «Жетісу» ӘКК басшылығы енгізілді.
Облыс әкімі өз сөзінде осы бағыттағы басты шаралар ретінде әлеуметтік маңызы бар азық-түлік бағасының өсуіне жол бермеу үшін тұрақтандыру қорының жұмысын жандандыру, тауарлар, қызметтер, тарифтер мен коммуналдық қызметтер бағасын бақылау, еңбек нарығында тұрақтылықты сақтау және жағдайды мониторингілеп отыру, «Еңбек» бағдарламасы бойынша ауыл тұрғындарына несие беруді жалғастыру, еңбек қатынастарын қорғау мақсатында орта және ірі кәсіпорындармен меморандумдарға отыру, жалақы қарыздарын болдырмау керектігін қатаң ескертті. Сол сияқты көктемгі дала жұмыстарын уақытылы бастауды, азық-түлік қауіпсіздігін, нарықты ауылшаруашылығы өнімдерінің қажетті көлемімен қамтамасыз етуді де басты назарда ұстауы керектігін тапсырды.
Өз кезегінде әкім «Даму» қорымен бірлесіп, шағын және орта бизнес субъектілеріне несие беруді қосымша қаржыландыру жайын да қарастырған жөн екендігін, облыстағы ірі кәсіпорындар өз жағдайларының дамуына қатысты болжамды нұсқалар жасауы тиістігін әңгімеледі. Сондай-ақ, қазақстандық мазмұнды ұлғайтуға ерекше көңіл бөлінуі керек.
А.Баталов имидждік шараларды өткізуге бағытталған шығындарды және бюджеттің басымдық берілмейтін шығындарын қысқарту, көлік, жиһаз сатып алуды тоқтату қажеттігін де айтты. Облыс аумағында коронавирус инфекциясының туындауы мен таралуына жол бермеуді басты міндет ретінде атап өтті.
— Мемлекет басшысы ең алдымен халықтың алдындағы әлеуметтік міндеттемелердің орындалуын қамтамасыз етуді қатаң тапсырды. Оған бізде қаржы толық көлемде қарастырылған. Қажет болса, маңызды емес шығындарды қысқарту есебінен бұл қаржы көлемін арттыра аламыз. Биыл 46 мыңнан астам жұмыс орнын құруды жоспарлап отырмыз. Оған қоса біз еңбек нарығының қажеттілігін зерттеп, біліп отыруымыз керек, және соған қарай кадрларды қайта оқытып, жұмысқа орналастыруға тиіспіз. Облыста жүзеге асырылып жатқан ірі-ірі жобалар бар, соларға қажетті мамандықтарды айқындап, азаматтарды тұрақты жұмыс орындарымен қамтуды белсенді атқаруымыз керек. Дүрлігудің қажеті жоқ, бұрын қалай жұмыс істесек, дәл солай жұмыс жасаймыз. Тек қоғамдық-саяси тұрақтылықты бақылау, бағаны мониторингілеу сияқты маңызды жұмыстардың қарқынын күшейтуіміз керек. Бұл облысқа ғана емес, барлық аудан, қалаларға да қатысты, — деді облыс әкімі.
Аймақ басшысы «Твиттер» парақшасында да өткізілген жиынның ауқымдылығын түсіндіріп, жазба қалдырды. «Алматы облысының жедел әрекет ету штабының отырысын өткіздім. Күн тәртібінде экономикалық мәселелер қаралды. Өз кезегінде орынбасарларыма және басқарма басшыларына әр саладағы көкейкесті мәселелерді назарға алуды тапсырдым,» — деп жазды ол.
«ЖЕТІСУ-АҚПАРАТ»
