Қазақстан Дүниежүзілік банктің қолдауымен 33 жыл ішінде 8 млрд доллардан астам сомаға елуден астам маңызды жобаны табысты жүзеге асырды, – деп хабарлайды 7-su.kz ақпараттық порталы.
Ауқымды әріптестіктің нәтижелері мен келешегі Премьер-министрдің орынбасары – ұлттық экономика министрі Серік Жұманғарин мен Дүниежүзілік банктің Еуропа және Орталық Азия өңіріндегі әл-ауқат мәселелері жөніндегі өңірлік директоры Абебе Адугнаның кездесуінде талқыланды. Тараптар ағымдағы экономикалық жағдайды, реформалардың одан арғы бағыттарын, инфрақұрылымды дамытуды және серіктестік мүмкіндіктерін сараптады. Кездесуді ашқан Серік Жұманғарин еліміздің Дүниежүзілік банк тобымен қарым-қатынасының стратегиялық сипатын атап өтті. Жылдар бойғы бірлескен жұмыс барысында банктің қолдауымен көлік, білім беру, қоршаған ортаны қорғау, жасыл технология және цифрландыру саласында жалпы сомасы 8 млрд доллардан асатын қаржыға 50-ден астам жоба жүзеге асырылды.
Өз кезегінде Абебе Адугна Қазақстан экономикасының өсуі мен инвестициялық белсенділігіндегі оң динамиканы айрықша атап өтті. Жиынның едәуір бөлігі инфрақұрылымды дамытуға және оны қаржыландыру тетіктеріне арналды. Дүниежүзілік банк өкілдері инфрақұрылымдық инвестицияларды олардың тиімділігін арттыратын және өнімділік пен инновацияның өсуіне жағдай жасайтын институционалдық әрі реттеуші реформалармен сүйемелдеу маңызды екеніне тоқталды. Осы орайда Серік Жұманғарин елдегі инфрақұрылымды дамыту тек ішкі қажеттілік тұрғысынан ғана емес, аймақтық контексте де қарастырылып жатқанын жеткізді. Мұндағы басты бағыт – Орталық Азияны басқа аймақтармен байланыстыратын көлік бағыттарын одан әрі дамыту.
«Қазақстанның инфрақұрылымы – Орталық Азияның ірі бірыңғай инфрақұрылымдық тізбегін құрудағы алғашқы қадам ғана. Сөз тек біздің ішкі жолдарымыз бен теміржолдарды жақсарту туралы ғана болып отырған жоқ. Бұл жолдардың барлығы біз үшін және көрші елдер үшін тиімді болуын қамтамасыз етуіміз керек», – деп атап өтті Серік Жұманғарин.
Дүниежүзілік банк халықаралық озық тәжірибені ескере отырып, инфрақұрылымды қаржыландыру тетіктері бойынша қазақстандық тараппен тиімді жұмысты одан әрі жалғастыруға дайын екенін білдірді. Бірлескен бастамалар өңірдегі тұрақты экономикалық өсімді қамтамасыз етуге және халықтың әл-ауқатын арттыруға тікелей ықпал етеді.
