Жамбыл ауданында көктемгі дала жұмыстары қызу жүріп жатыр. Ауа райының қолайлы мерзімін барынша тиімді пайдалануға тырысқан диқандар бүгінде егістікті дайындау жұмыстарының жартысынан астамын еңсеріп, дән егуге кірісті.
Ауданның бас агрономы Қайрат Тойшыбековтің айтуынша, жоспарланған 40 838 гектардың 25 мыңына ылғал жабылды. Себу алдында өңделуге тиісті 22 мың гектар алқаптың 16 мыңына осы жұмыс атқарылды. Жер жырту да оңтайлы мерзімде басталып, 26 300 гектар егістіктің 18 мыңына соқа салынды. Енді осы дайындалған алқаптарға жаздық масақты дәнді дақылдар себіліп жатыр. Оның ішінде алдымен арпа дәні топыраққа сіңірілді. Бұл орайда аудан бойынша биыл 33 700 гектар жерге масақты дәнді дақылдар егілмек. Бүгінде соның 5500 гектарына арпа егілді. Қалған жеріне алдағы күндері арпадан өзге де дақылдар себіледі. Күзде 14 мың гектар жерге бидай егілген, оның шығымы жақсы.
Аудан әкімі Бағдат Әлиев ауылдарды аралап, дала жұмыстарының жайын білді. Үңгіртас ауылы маңында «Империя Фуд» жауапкершілігі шектеулі серіктестігінің жұмысшылары еңбек көрігін қыздыруда. Мұнда жаздық арпа себілуде. Науқандық іске арнаулы техникаларымен жеті «МТЗ», бір «К-700» тракторы және екі «КамАЗ» жүк көлігі тартылыпты. Алқап басында дала қосыны құрылып, жұмысшыларға мейлінше қолайлы жағдай жасалған. Үңгіртас селолық округінің әкімі Дәурен Абдуәлидің айтуынша, осы көктемде округ бойынша 629 гектар жерге жаздық арпа себілмек. Сәуірдің соңына таман 108 гектарға жүгері егіледі.
Қуатты тракторды тізгіндеген Жауынбек Сыдықов тәжірибелі механизатор ретінде бұл аймаққа танымал. Қожалық иелері оны қолы берекелі азамат санайды. Ол сепкен дәннің шығымы жақсы болатынын ауыл әкімі де растады. Лайым, солай болғай. Диқандар алдағы мол өнімге осылайша негіз қалауда.
Серік САТЫБАЛДИЕВ
Үңгіртас ауылы,
Жамбыл ауданы
Сурет ғаламтордан алынды
