Райымбек ауданындағы картоп өсіру бағытында құрылған бірнеше өндірістік кооперативтің еңбегі елеулі. Биыл өңірдегі картоп көлемі 6050 гектарға жетіп, оның ішінде 3000 гектарға голландиялық тұқым отырғызылды. Екінші нан саналатын картоп өсіруде Қақпақ ауылдық округі диқандарының үлес салмағы жоғары. Биыл округ бойынша 750 гектар жерге картоп тұқымы сіңірілді.
– Ауылымыз сулы, нулы жерге орналасқандықтан тұрғындар картоп пен көкөністі жақсы өсіреді. 750 гектар картоптан бөлек 537 гектар дәнді дақыл алқабы, 15 гектар көкөніс бар. Бір ғана Ғани Сыдықақынов басқаратын «Бақыт» шаруа қожалығы 30 гектар жерге картоптың сортты тұқымын отырғызды. Оның сыртында 50 гектар жерге арпа екті. 50 гектар күздік бидайы жақсы жетіліп келеді. Нұрлан Құдиярбеков, Нұрбол Анарқұлов басқаратын шаруа қожалықтары да картоп көлемін ұлғайту үстінде, – дейді Қақпақ ауылдық округінің әкімі Жұмаш Әлімғожаев.
Біз Қақпақ ауылындағы Берік Сатыбалдиев жетекшілік жасайтын «Бақыт-1» шаруа қожалығының картоп алқабында болдық. 10 гектар жерге картоптың голландиялық «Санте», «Агрия» тұқымы отырғызып жатыр. Оларға «Бақыт» шаруа қожалығының механизаторы Бағдат Сыдықақынов жаңадан сатып алған «Беларусь 921,3» маркалы тракторы, картоп отырғызатын агрегатымен көмектесіп, істеріне дем беруде. Биылғы жылдың басынан бастап картоп өсіру бағытында құрылған «Үш Қақпақ» атты өндірістік кооперативтің басшысы Бақыт Қуанды да осы жерден жүздестіріп, бастап жатқан істеріне сәттілік тіледік.
Қ. САТЫБАЛДЫҰЛЫ
Райымбек ауданы
