«Жетісу» ӘКК» ӨДИ» АҚ — Алматы облысында азық-түлікті тұрақтандыру қорының жұмыс істеуін қамтамасыз ететін мамандандырылған ұйым. Тұрақтандыру қоры азық-түлік нарығына реттеушілік ықпал ету үшін құрылған азық-түлік тауарларының жедел қоры және бағаның өсуін тежеу мен тұрақтандыру тетіктерінің бірі саналады.
Тұрақтандыру қорына ҚР Үкіметінің қаулысына сәйкес бекітілген тізбе бойынша әлеуметтік маңызы бар азық-түлік тауарлары сатып алынады. Аталған тізбеге күнбағыс майы мен тұзды қоспағанда, оның 17-сі облыс аумағында өндіріледі, 19 тауардың түрі кіреді. Азық-түлік тауарларының бөлшек бағасы аймақтың азық-түлік тауарларының тұрақтандыру қорын басқару жөніндегі комиссиямен бекітілген. Бүгінгі таңда әлеуметтік маңызы бар азық-түлік тауарларын өткізу бойынша іркілістер байқалмайды.
Облыстың тұрақтандыру қоры 2015 жылдан бастап 10 991,2 тонна азық-түлік тауарларын сатып алды, оның 8626 мың тонна өнімі өткізілді. Қазіргі таңда қорда 2364,8 тонна өнім бар. Оның ішінде 1686,9 тонна ұн, 608,1 тонна қант, 18,5 тонна күріш, 9491 литр сұйық май, 0,7 тонна кеспе, 7,1 тонна пияз, 33,8 тонна картоп. Сондай-ақ, «Жетісу» ӘКК бүгінгі күні нанның бағасын қалыпты ұстап тұру мақсатында 2019 жылдың қарашасынан бастап облыстағы наубайханаларға арзандатылған ұн жеткізіп келеді. Өнім отандық өндірушілер – Қарасай ауданындағы «АзияАгроФуд» АҚ және «Семей-Элита-2» кәсіпорнынан сатып алынды. «Жетісу» ӘКК облыстың 52 наубайханасымен бірінші сұрыпты бидай ұнын жеткізу жөнінде агенттік келісім жасады. Қазір наубайханаларға 4 мың тоннадан аса ұн жөнелтілді.
Наубайханаларға ұнды жеткізу мамыр айына дейін жалғасады деп жоспарланып отыр. Кәсіпкерлерге ұн бір келі үшін 90 теңге бағамен берілді. Соның арқасында наубайханада пісірілген нанның бағасы 85 теңгеден аспайды. Сонымен бірге, Талдықорған дүкендерінде қолжетімді бағамен әлеуметтік маңызы бар тауарлар сатылатын «әлеуметтік сөрелер» орнатылды. «Жетісу» ӘКК» ӨДИ» АҚ-ның мәліметінше, қазіргі уақытта Талдықорған қаласының және Өтенай ауылының дүкендерімен бес агенттік келісім жасалды.
Аталмыш бес дүкенде облыстың тұрақтандыру қорының өнімдері белгіленген баға бойынша сатылып келеді. Олардың қатарында құмшекер, күнбағыс майы, күріш, кеспе, картоп және пияз бар. Отандық өнімдер жоғары сапалылығымен және қолжетімді бағасымен ерекшеленеді. Бұл азық-түліктерді дүкендерден «Әлеуметтік маңызды тауарлар» атты арнайы бұрыштан табуға болады.
Айгүл БАЙЖҰМАҚЫЗЫ
Алматы облысы
Сурет ғаламтордан алынды
