Биыл аудан бойынша 4490 гектар жерге арпа себіліп, 2465 гектар жерге картоп отырғызылады. Оның сыртында 271 гектар көкөніс бар. Өткен жылы дәнді дақыл алқабының әр гектарынан 20 центнерден, картоптың әр гектарынан 185 центнерден өнім алынды.
Картоп дақылының көлемі мен өнімін арттыру мақсатында Қарқара ауылдық округіне қарасты «Қарқара өнімдері» ЖШС Оңтүстік Кореялық компаниямен бірлесе отырып, голландиялық «Санте» тұқымын 40 гектар жерге отырғызып, 800 тонна өнім алды. Биыл олар супер элиталық тұқым арқылы картоптың көлемін арттыруды жоспарлап отыр.
Көктем егісі ауа райы жылы әрі қолайлылау Жалаңаш аймағында жүргізілу үстінде. Жер айдау, дән себу жұмыстары да қатар жүргізілуде. Кеген, Шырғанақ, Бөлексаз, Қарқара өңірлерінде көктемгі егіс басталды.
Жалаңаш өңірінде Ә. Ермегияев, Ә. Сыбанбаев, Ж. Игібаев басқаратын шаруа қожалықтары, «Көлбастау» өндірістік кооперативі, «Кеген АГРО» ЖШС көктем егісін ұйымшылдықпен жалғастырып келеді.
Қанат БІРЖАНСАЛ
Кеген ауданы
