Премьер-Министр Асқар Маминнің төрағалығымен өткен Үкімет отырысында ҚР Президенті Қасым-Жомарт Тоқаевтың «Жаңа жағдайдағы Қазақстан: іс-қимыл кезеңі» атты Қазақстан халқына Жолдауын іске асыру жөніндегі шаралар қаралды.
Шарада Ұлттық экономика министрі Р.Дәленов, Ұлттық банк төрағасы Е.Досаев, Қаржы нарығын реттеу және дамыту агенттігінің төрағасы М.Әбілқасымова, Қаржы министрі Е.Жамаубаев, Ауылшаруашылық министрі С.Омаров, Индустрия және инфрақұрылымдық даму министрі Б.Атамқұлов, Энергетика министрі Н.Ноғаев, Ішкі істер министрі Е.Тұрғымбаев, Экология, геология және табиғи ресурстар министрі М.Мырзағалиев, Еңбек және халықты әлеуметтік қорғау министрі Б.Нұрымбетов, Денсаулық сақтау министрі А.Цой, Білім және ғылым министрі А.Аймағамбетов, сондай-ақ, Цифрлық даму, инновациялар және аэроғарыш өнеркәсібі министрінің міндетін атқарушы Б.Мусин баяндама жасады.
– Жолдауда алға қойылған міндеттерді орындау экономиканың орнықтылығы мен бәсекеге қабілеттілігін арттыру факторына айналады. Мемлекет басшысы жаңа жағдайға сәйкес келетін мемлекеттік және экономикалық саясатты уақытылы әзірлеу бойынша нақты іс-қимыл жоспарын белгіледі, – деді Асқар Мамин. Премьер-Министр халықтың әл-ауқатын жақсарту үшін экономиканы одан әрі дамыту бойынша жауапты міндеттер жүктелгенін атап өтті.
Үкімет басшысы бюджеттік жоспарлаудың жаңа жүйесі ұлттық басымдықтарды қамтамасыз етіп, жоспарлау жүйесінің бір бөлігіне айналуы тиіс екенін бөліп айтты. Сонымен қатар, бюджеттен тыс қорларды ескере отырып, «кеңейтілген бюджетті» енгізу керектігі айтылды.
Премьер-Министр Жолдаудың тұрғын үйдің қолжетімділігін, қолайлы отбасылық-демографиялық жағдайларды, жақсы экологияны, қолжетімді әрі сапалы білімді қамтамасыз етіп, сондай-ақ денсаулық сақтау жүйесін жақсартуға бағытталғанын атап өтті.
Халықтың әл-ауқатын арттыру үшін экономиканы одан әрі дамыту бойынша үлкен міндеттер қойылды. Мемлекет басшысы Жолдауының барлық бағыттарын іске асыру бойынша биылғы 7 қыркүйекке дейін Жалпыұлттық жоспар әзірленіп, Президенттің бекітуіне жіберіледі. Үкімет басшысы Президенттің әрбір тапсырмасының іске асырылуына қатаң бақылау орнатып, оған нақты орындалу мерзімі мен жауапты адам белгіленуі тиіс екенін атап өтті.
Селекторлық жиын соңында Алматы облысының әкімі Амандық Баталов орынбасарлары мен басқарма басшыларына жаңа балабақшаларды пайдалануға беруге дайындау, медициналық мекемелердің саны мен сапасын арттыру жайлы тапсырма берді. Денсаулық сақтау орындарын жасанды тыныс алдыру және оттегі концентраторы аппараттарымен жабдықтау жайлы міндеттер қойды.
Гүлжан ТҰРСЫН
Алматы облысы
Сурет — ғаламтордан
