Бұл туралы «Жетісу» әлеуметтік кәсіпкерлік корпорациясы» өңірлік даму институты» акционерлік қоғамының басқарма төрағасы Талғат Малыбаевтың төрағалығымен өткен жиында айтылды. Онда сервистік-дайындау орталықтарын құру және ауылшаруашылығы техникасын сатып алу туралы мәселелер талқыланды.
Жиынға «Жетісу» ӘКК» ӨДИ» АҚ басқарма төрағасының орынбасары Ерғазы Орымбасаров, Балқаш, Ескелді, Көксу, Райымбек аудандары әкімдерінің орынбасарлары, шаруа қожалықтарының басшылары мен ауылшаруашылығы техникасын шығаратын кәсіп- орындардың өкілдері қатысты. Талғат Жанболатұлы өз сөзінде аталған орталық ауылшаруашылығын дамытуда және кәсіпкерлерді шоғырландыруда маңызды орын алатынын атап өтті.
2011-2019 жылдары «Жетісу» ӘКК қызылша және аралас салалары бойынша 45 СДО құрылған. Оның ішінде қант қызылшасы, дәнді дақылдар, көкөніс, жүгері, күріш, картоп және жем дайындау бағыттары бар. Аталмыш орталықтарға 1116 дана ауылшаруашылығы техникасы берілген. Талғат Жанболатұлы СДО құру бойынша барлық рәсім заң талаптарына сәйкес ашық жүргізілуі тиіс екенін айтты. СДО ашуды жоспарлап отырған шаруа қожалықтарының басшыларымен дайындық мәселелері, шаруашылықтардың қаржылық жағдайы, жер учаскелерінің болуы, техниканы сатып алу жоспары, лизинг шарттары талқыланды.
– Сервистік-дайындау орталықтарының міндеттерінің бірі облыстың тұрақтандыру қорын бірінші қажеттіліктегі азық-түлікпен қамтамасыз ету. Дайын өнім болған жағдайда тұрақтандыру қоры аталған өнімді сатып алуға ниетті немесе оларды нарықтық құнынан төмен бағамен сату үшін әлеуметтік дүкендерде сауда нүктелерін ұсына аламыз, – деді Талғат Жанболатұлы.
Талқылау барысында облыстың ірі күріш шаруашылықтарының бірі «БірлікАгроФирма» ЖШС басшысы Әбдіжаппар Қыстаубаев кәсіпорынды одан әрі дамыту, машина-трактор паркін жаңарту және шығындарды төмендету мақсатында күріш бағыты бойынша СДО құру қажеттігін айтты.
– Біз жыл сайын 5 мың гектардан аса алқапта күріш егеміз. Балқаш ауданында күріш өсірумен айналысатын ірі шаруашылықтардың біріміз. Сондай-ақ, облыстың тұрақтандыру қорына күріш жеткізе бастадық. Шаруашылықты одан әрі дамытқымыз келеді. Қазір бізде бар техниканың басым бөлігі ескірген. Бәсекеге қабілетті болу үшін бізге машина-трактор паркін жаңарту қажет, – деп түсіндірді аталмыш серіктестік басшысы.
«Дүйсенбінов А. Қ.» қызылша шаруашылығының басшысы Айдын Дүйсенбінов биыл қызмет саласын кеңейтіп, сүтті және етті тұқымды мал өсіруді жоспарлап отырғанын айтты. Осы мақсатта СДО құрып, онда мал азығын дайындау үшін ауылшаруашылығы техникасын сатып алуға ниетті.
– Біз қант қызылшасын 400 гектардан аса алқапқа егеміз. Өткен жылы 19 мың тонна өнім жинап, зауытқа тапсырдық. Қазір шаруашылық базасында 100 бас ірі қара малға арналған тауарлы-сүт фермасы және 1 мың бас ұсақ малға арналған бордақылау алаңы жұмыс істейді, – деп қосты фермер.
Ескелді ауданы әкімінің орынбасары Ермек Әпеков шаруашылықтың жұмыс нәтижелері мен жоспарларын растады. Райымбек ауданында шаруалар жаңа СДО құруға дайын отыр. Онда жемшөп дайындау және картоп өсіру қолға алынбақ. Райымбек ауданы әкімінің орынбасары Самат Сатылғанов құрылып жатқан СДО қатысушыларында шамамен 2000 гектар жер бар екенін хабарлады. Осыған байланысты ауылшаруашылығы техникасы қажет.
– Райымбек ауданы шалғай жатқан аудан болған соң бүгінгі күні шаруашылықтардың техника паркі қатты ескірді. Аудан шаруашылықтарын көтеру үшін облыс басшылығы барынша қолдау көрсетуде. Алдыңғы жылы тұқым өсіру шаруашылықтарына картоптың элиталық тұқымдары әкелініп, өнімділік бойынша жақсы нәтижелер көрсетті. Осы бағытты одан әрі дамыту, сондай-ақ, қолда бар мал басының жемшөп дайындығын дамыту үшін ауданда ауылшаруашылығы техникасын жеңілдетілген шарттар бойынша алу қажеттілігі бар, – деп атап өтті Самат Сатылғанов.
Жиын соңында биыл облыста алты жаңа СДО құру жоспарланып отырғаны белгілі болды. Атап айтқанда, Жамбыл, Көксу, Ескелді аудандарында, жем дайындау және картоп бағыты бойынша Райымбек ауданында, күріш бағыты бойынша Балқаш және Қаратал аудандарында СДО-лар құру ойға алынуда.
Ауылшаруашылығы техникаларын өндіруші кәсіпорындардың ресми өкілдеріне техниканың құны мен оны уақытылы жеткізуге қатысты сұрақтар қойылып, Талдықорған қаласында компаниялардың сервистік орталықтарын құру бойынша ұсыныстар айтылды. Шаруашылық басшылары техниканың бір бөлігін көктемгі егіс жұмыстарына дейін алу керектігін мәлімдеді. Сонымен қатар, шаруа қожалықтары үшін теориялық және практикалық оқыту жүргізіледі.
Жиынды қорытындылаған Талғат Жанболатұлы өндіруші компаниялар өкілдеріне шаруалар үмітінің ақталуы тиіс екенін және техникалардың көктемгі егіс жұмыстары басталғанға дейін уақытылы жеткізілуі қажет екенін айтты.
Айгүл БАЙБОСЫНОВА
Сурет ғаламтордан алынды
