Сәулетшілік өнердің өрісі кең. Ақ қағазға айшықтала түсетін сан түрлі жобалардың сызбалары тәуелсіз еліміздің тарихи-мәдени дамуында, сәулет құрылысында айрықша маңызға ие екендігін ескерер болсақ, бұл аталған мамандық иелерінің шығармашылық ізденісі мен кәсіби шеберлігін де айқындайды. Жылма-жыл халық саны еселеп артып келе жатқан ауданда бой көтерген жаңа нысандар көп. Солардың әрбірінің заңдық талаптарға сай орналастырылып, сән-салтанатымен салынуына сәулетшілердің сіңірер еңбегі орасан зор.
– Бүгінгі уақыт талабына лайық халыққа қызмет етудің сапасы мен жауапкершілігі өте жоғары. Ауданымыздың көркеюіне өзіндік қолтаңбасын қалдырып жүрген сәулетшілердің бұл жолдағы еңбектері де өлшеусіз. Біздің мекемеде «электрондық құжат айналымы» бойынша осы жылдың қаңтары мен мамыр айы аралығында 8760 кіріс хат енгізілген. Яғни, бұл сала мамандарына жүгінетін сұраныстың жылдан-жылға артып келе жатқандығын көрсетеді, – дейді Талғар аудандық сәулет және қалақұрылысы бөлімінің басшысы Марат Рысбеков.
– Аталған бөлім қызметкерлері тұрғындарға 4 түрлі мемлекеттік қызмет түрін көрсетеді. Атап айтсақ, біріншіден, ҚР аумағында жылжымайтын мүлік объектілерінің мекенжайын айқындау бойынша берілетін анықтамалардың саны 1652-ге жетсе, екіншіден, берілген сәулет жоспарлау тапсырмаларының саны (АПЗ) артып келеді. Бүгінде ол – 1201-ге жетіп отыр. Сонымен бірге, тіреу және қоршау конструкцияларын, инженерлік жүйелер мен жабдықтарды өзгертпей, қолданыстағы ғимараттардағы үй-жайларды (жекелеген бөліктерін) реконструкциялауға (қайта жоспарлауға, қайта жабдықтауға) шешім шығарылады, – деген ауданның бас сәулетшісі барлығы мемлекеттік көрсетілетін қызмет стандарты бойынша қысқа мерзім ішінде дайындалатындығын тілге тиек етті.
Мекеме мамандарының құзыретіне кіретін 4-ші міндет – эскизді (эскиздік жобаны) келісу. Бұл мақсатта 1652 өтінім қабылданған. Бұл да объектілердің күрделі және күрделі еместігіне қарай 10 және 15 жұмыс күні аралығында атқарылады.
Сәулет және қалақұрылысы бөлімі өз құзырына сәйкес қосымша 13 түрлі қызмет түрін көрсетеді. Олардың дені жерге орналастыру, жер учаскесін таңдау және зерттеу актісі, жер учаскесіне дайындалған қорытынды және жер учаскесінің қызыл сызығын анықтау сынды өтініштерді саралайды.
Мемлекеттік мекемеде көрсетілген іс-шараларды орындау үшін сыбайлас жемқорлыққа қарсы іс-қимыл бойынша, оның ішінде, мемлекеттік қызмет этикасы, мүдделер қақтығысының жолын кесу, қызметтік тәртіпті сақтау бойынша құқықтық оқытуды тұрақты жүргізіп отырады. Бөлім мамандарымен жеке түсіндіру, насихаттау жұмыстарының жібін үзбеу дәстүрге айналған. Бөлім тарапынан көрсетілетін мемлекеттік қызмет көрсету кезінде стандарттарды қатаң басшылыққа алу қадағаланады. Сонымен қатар, жеке және заңды тұлғалардың өтініштерін қарастыру және жауабының уақтылы берілуі басты назарға алынған. Осындай жоғары талаптың арқасында мамандардың іскерлігі артып, ел ризашылығына бөленуде десек, еш әсірелегендік емес. Бұл орайда бөлімнің бас мамандары Қуаныш Аскеев пен Дәурен Мұқанов, сондай-ақ, сан жылдар еңбек етіп келе жатқан Сиезбек Бүйембаев, Қуатбай Патулаевтың есімдерін ерекше атау ләзім.
Бүгінде баспанаға қол жеткізудің тиімділігін арттыратын мемлекеттік «Нұрлы жол», «Нұрлы жер» және «7-20-25» бағдарламалары жүзеге асырылуда. Бұл орайда Талғар өңірінде де айтулы жобалар іске асуда. Соның бірі – «Жаңа Талғар» көпқабатты жаңа мөлтекауданның бас жобасы. Қаланың көркіне көрік қосылып, сәулеті келіскен еңселі тұрғынүйлердің бой көтеретін уақыты да алыс еместігін тілге тиек еткен Марат Тұқанұлы бұдан өзге де ірі жобалардың эскизі жасалып жатқанын арқау етті. Олай болса, құрылыс қарқын алып, көпқабатты тұрғын үй кешендері бой көтеріп жатқан бүгінгі күнде сәулетшілер еңбегінің жарқырай көрініс табуымен қатар, шығармашылық шеберліктерінің де сыналар сәті туғандығын айрықша атағымыз келеді.
Аудандық сәулет және қалақұрылысы бөлімі орналасқан еңселі ғимаратта «Талғар ауданы. Сәулет» жауапкершілігі шектеулі серіктестігінің мамандары да халыққа қалтқысыз қызмет етеді. Аталған серіктестікте ширек ғасырдан астам уақыт табан аудармастан еңбек сіңіріп келе жатқан нәзік иықты сәулетші Рыскүл Базарбекованы өз ісінің хас шебері екендігін ел біледі. Жауапкершілігі зор мамандықты таңдаған талантты сәулетші бойындағы суретшілік өнердің нәрі мен сөлін, қаламының қуатын осы саланың жандануы мен жаңғыруына жұмылдыруда.
– Сәулетші болу ер азаматтарға ғана лайық мамандық тәрізді көрінетін. Шын мәнінде, ол шығармашылық ізденіс пен ерен еңбектің шыңы саналады. Тәуелсіз еліміздің тарихында қаншама ғимараттар бой көтеріп, әлеуметтік-тұрмыстық нысандар салынуда десеңізші?! Соның әрбірінде сәулетшінің қолтаңбасы қалып жатады. Сондықтан, жауапкершілігі мол салада еңбек етіп жүрген әріптестерімді кәсіби мерекелерімен құттықтап, еңбектерінің жемісін көруін тілеймін, – дейді тәжірибелі сәулетші Рыскүл Бейсенәліқызы.
Міне, ауданның көркеюі мен гүлденуіне, тұрғындардың талап-тілегінің дер шағында орындалуына жұдырықтай жұмыла еңбек сіңіріп жүрген сәулетшілер еңбегінің ақталып, абырой биігінен көрінуіне тілектестігімізді білдіреміз.
Ұлбосын ИСАБЕК
Талғар ауданы
