Ұлттық банк төрағасының орынбасары Әлия Молдабекова тамыз айында болған теңгенің айырбас бағамындағы тұрақсыз жағдайға жауап берді.
— Тамызда кейбір күндері теңгенің сыртқы емес, ішкі факторларға байланысты нығайғанын байқадық. Негізінен, бұған салық төлемдері есебінен валюта ұсынысының маусымдық өсімі әсер етті. Бір сөзбен айтқанда, «салық» аптасы. Оның айқын әсері дағдарыс басталғаннан бері бірінші рет наурыз айында байқалды, ол кезде, керісінше мұнайдың бағасы ең төменгі шекке дейін құлдыраған, — дейді ол.
Молдабекованың айтуынша, дәстүрге сай тамыз айында тағы бір маусымдық фактор болды, ол — жазғы демалыс маусымына байланысты туындаған сұраныс. Бірақ биыл пандемиямен байланысты бұл фактор жылдағыдай көлемде мінез таныта алмады.
— Тамыз айында кепілдендірілген трансфертті қамтамасыз ету үшін Ұлттық банк Ұлттық қордағы 681 миллион доллар көлеміндегі шетел валютасын сатты. Тамыздағы трансферттің конверсия мөлшері алдыңғы айлармен салыстырғанда айтарлықтай төмен болды, бірақ бұл валюта нарығындағы тепе-теңдіктің бұзылуына әкеп соқпады, — деді ол.
Оның сөзіне қарағанда, квазимемлекеттік сектор компаниялары өздерінің міндеттемелері шеңберінде бір айда валюталық түсімдерінің бір бөлігін 266 миллион долларға сатты, бұл да сұранысты теңестірді.
Теңге бағамының түсуі мұнай бағасының төмендеуімен байланысты. Қыркүйектен бастап мұнай бағасының төмендеуі дамушы елдердің экономикасына кері әсер етті. 15 маусымнан бері бірінші рет мұнай бағасы 40 доллардан түсіп кетті. 8 қыркүйекте 39,4 доллар болды.
«ЖЕТІСУ-АҚПАРАТ»
