Қапшағай қаласының әкімі Нұрлан Құматаевтың қатысуымен Шеңгелді ауылында орналасқан су сорғысы мәселесі бойынша жиын өткізілді. Бұл туралы Қапшағай қаласы әкімінің баспасөз қызметі хабарлады.
Шараға ауылшаруашылығы, құрылыс, заң-құқық бөлімдерінің басшылары қатысты. Сондай-ақ, жиында «Вектор-проект» ЖШС қызметкері И.Нигданов, №3,5 «Көксу» ЖШС сорғы стансысының басшысы С.Зенкин және инженер-гидротехникашы Г.Керімбаева, Тараз қаласындағы «Қазақ су шаруашылығы ғылыми-зерттеу институты» ЖШС «Суару технологиясы мен техникасы» бөлімінің меңгерушісі А.Калашников, «Проектный институт Казгипроводхоз» ЖШС басшысы А.Рябцев те болды.
Бүгінде Шеңгелді суару аумағының сорғы стансыларын жөндеу кезек күттірмейтін проблеманың бірі болып отыр. Сондықтан, арнайы келген мамандар тозығы жеткен сорғыларды қалпына келтіру бойынша өз ойларын ортаға салып, әр тараптан пікірлерін білдірді.
Басқосуда ауылшаруашылық дақылдарын суаруға тиімді сорғы түрлері, Қапшағай су қоймасының деңгейін көтеру және жаңбырлатып, тамшылатып суару технологиясын енгізу жүйесі де қоса қарастырылды.
Жиын қорытындысында Шеңгелді аумағында орналасқан №1 «Овощводхоз» ЖШС сорғы стансысына тамшылатып суаруды және қалған стансыларын қалпына келтіру жобалары іске асырылатын болды. 1978, 1982, 1986 жылдары іске қосылған 9 сорғының қазір істеп тұрған 6-уы аталмыш округ шаруа қожалықтарының егіншілігін суаруды қамтамасыз етеді.
Жалпы, биылғы егіс көлемі — 13 666 га. Оның 4297-сі дәнді дақыл, 3941-і арпа, 356-сы дәндік жүгері. Сонымен бірге, 4062 га майбұршақ пен мақсары, картоп — 350 га, көкөністер – 1745 га, бақша дақылдары — 190 га, мал азықтық дақылдар — 2155 га, қант қызылшасы — 867 га құрайды.
«ЖЕТІСУ-АҚПАРАТ»
