«Тексан Қазақстан Инвест» ЖШС зауыты Шолаққарғалы селолық округіне қарасты Қасымбек ауылында орналасқан. Атшаптырым аумақты алып жатқан қазақ-түрік бірлескен өндіріс орны 2012 жылдың соңында жұмысын бастаған болатын. Кәсіпорын жарық-электр жабдықтарын және металл бұйымдарын шығарады.
Мұнда жарықдиодты шамдардың 350-ден астам түрі өндіріледі. Олардың қатарында кеңсеге, көшеге, тұрмысқа және өнеркәсіп орындарына арналған әртүрлі шам бар.
Зауыт елде бірегейлігімен ерекшеленеді. Елімізде осындай өнім түрлерін шығаратын өзге кәсіпорындар бар болғанымен олар дайын бөлшектерді құрастыруға негізделген. Ал мұнда пластик, металл бөлшектердің барлығы да өзінде құйылып, құрастырылып, тұтынушыға дайын өнім түрінде ұсынылады. Сондай-ақ электр сымдарының түр-түрі өндіріледі. Кәсіпорында, сонымен қатар, металдан да көптеген тауар дайындалады. Оқушы парталары, көшеге, саябақтарға арналған әдемі орындықтар, кеңсе сейфтері, терминал жәшігі, төсек, басқа да сапалы бұйымдар өндіріледі.
Әуел баста 25 жұмысшымен іске қосылған кәсіпорында бүгінде 160-тай адам тұрақты жұмыс істейді. Еңбекақылары алыс ауыл үшін жоғары десе болады, айына 180 мыңға дейін алатындарда бар. Мұнда жергілікті тұрғындар да еңбек етеді. Олар Қасымбекпен қоса жақын маңдағы Үмбетәлі, Мыңбаев, Ұзынағаш ауылдарынан келіп істейді. Жұмысқа ынталы ауыл жастарын істің қыр-сырына үйретіп, тұрақты орналастыруға зауыт басшылығы ықыласты. Ал алыстан келетіндер үшін зауыт жанынан арнайы 100 орынды жатақхана салынған. Онда орналасқандар тегін тұрады. Ішінде бильярд бөлмесі, ауласында теннис, шағын футбол алаңы жабдықталған. Жұмыс істеймін деген ауыл жастарына осындай жағдай жасалған.
Өндіріс орнының болашағы зор. Өйткені электр жабдықтарына сұраныс артпаса, кемімесі анық. Сондықтан кәсіпорын жылдан-жылға өнім түрлерін көбейтіп, сапасын арттыруда.
Өндіріске озық технология енгізіледі. Мәселен, металға ойылатын ою-өрнектер заманауи лазер қондырғысымен салынады. Кәсіпорын айына орта есеппен 200 мың бірлік өнім шығарады. Елімізде сапалы электр тауарларына деген нарық сұранысының басым бөлігін осы зауыт өтеп келеді. Өнімдері өз елімізден тыс Қырғызстан, Өзбекстан сияқты таяу шетелдерге жөнелтіледі. Сондай-ақ, Парсы шығанағы мен Латын Америкасына да экспортталды.
Серік САТЫБАЛДИЕВ
Жамбыл ауданы
