Бейсенбіде облыстық мәслихаттың кезекті ХХІ сессиясы өтті. Сессияда облыс әкімі Амандық Баталовтың өткен 7 айда атқарылған жұмыстарының қорытынды есебі тыңдалды.
Өңір басшысы мәслихат депутаттарының назарына өнеркәсіп, ауылшаруашылығы, инвестиция тарту, білім мен денсаулық сақтау, туризм, спорт салаларындағы ілгерінді істер мен нәтижелі жұмыстарды ұсынды.
Жуырда Елбасы Бурабайда Парламент, Үкімет, Президент Әкімшілігі, Астана, Алматы қалалары мен облыс әкімдерінің қатысуымен жиналыс өткізген болатын. Басқосуда өңірлердің әлеуметтік-экономикалық дамуы, мемлекеттік бағдарламалардың жүзеге асырылу барысы қаралып, бірқатар нақты тапсырма берілгенін айтқан өңір басшысы облыста атқарылған негізгі жұмыстарға тоқталды.
– Біздің облыста барлық саланың дамып, өркендеуіне барынша жағдай жасалған. Негізгі салалар бойынша көрсеткіштер жақсы. Атап айтар болсақ, өнеркәсіптік өндіріс көлемі 4,3% өсіп, 396 млрд. теңгеге жетті. Азық-түлік өнімдері 7, сусындар 14, фармацевтикалық өнім 1,6 пайызға жоғарылады. Индустрияландыру картасы бойынша бұған дейін іске асырылған 51 жобаның 43-і өзінің жоспарын орындады. Қазіргі уақытта қалған кәсіпорындармен жұмыстар жүргізілуде. Жыл басынан бері әйнек және металл құрылымын өндіретін өндіріс орны ашылды. 14, 3 млрд. теңгені құрайтын өнеркәсіп нәтижелі жұмыс істеуде. Жыл соңына дейін тағы бес жоба іске қосылады. Биыл Қытай Халық Республикасының инвесторларымен ет өңдейтін кешен «Лунюань Жетысу» ЖШС іске қосылады. Ол жылына 20 мың тонна өнім өндіріп, 4, 0 млрд. теңге табыс тауып, 200 адамға жұмыс орнын ұсынады. Ал «Юнайтед Грин» деп аталатын ирандық компания балалар тамағын дайындайтын зауыт ашуға келісті. Ұлт жоспары – бес институционалдық реформасын жүзеге асырудың 55-56 қадамдарында көрсетілген тапсырма бойынша облысқа «ЭКО-культура», «ЭФКО», «Маревен Фуд Тянь-Шань», «ЛУКОЙЛ Лубрикантс», «United Green», «Farm Frites», «Бауман» – барлығы 7 трансұлттық компания тартылды. Соның ішіндегі «Маревен Фуд Тянь-Шань» компаниясы ағымдағы жылы өзінің «Ролтон» өнімін сатылымға шығарады. Жалпы ағымдағы жылдың 7 айында облысқа 205, 9 млрд. теңге инвестиция тартылды. «Нұрлы Жол» және «Нұрлы жер» бағдарламаларын іске асыру, сондай-ақ, өнеркәсіп, агроөнеркәсіптік кешен, газдандыру, энергетика салалары бойынша бірнеше жобаларды жүзеге асырудың нәтижесінде жыл соңына дейін бұл көрсеткіш 537 млрд. теңгеге артады деп күтілуде, – деді облыс әкімі.
Ауылшаруашылығы саласындағы жетістіктерді айтқан облыс басшысы биыл 198, 8 млрд. теңге көлемінде азық-түлік өндірілгенінен хабардар етті. Сондай-ақ, Жетісу жерінің 9,2 мың гектары қант қызылшасы алқабына айналғанын мақтанышпен жеткізді. Енді сол тәтті түбірден 323 мың тонна өнім алу жоспарлануда. Қант қызылшасын өткізетін Көксу қант зауыты өткен жылдан бері өнім қабылдауда. Биыл Ақсу қант зауытына 11 млрд. теңге инвестиция құйылып, зауыт өз жұмысын бастауға дайын. Ал жүгері дақылына 79 мың гектар жер бөлінген. «Азия АгроФуд» зауытының маңына қоспа жем шығаратын шағын цех орнатылып, болашақта «Қорғас – Шығыс қақпасы» аймағына жылдамдығы 40 мың тонналық зауыт салу жоспарлануда.
Өңірдегі шағын және орта бизнес жайлы сөз қозғаған өңір басшысы бұл сала көрсеткіші 8,6 пайызға артқандығын және туризм бойынша 7 айдың ішінде 43 жаңа жоба жұмылдырылғанын тілге тиек етті. «Айдынды Алакөлге келіп демалушылар саны жыл сайын артып келеді. Сондықтан да демалушылар үшін туристік аймаққа жұмылдырылған инвесторлар сапалы әрі жайлы құрылыс нысандарын салуы қажет. Алакөл жағалауындағы 300 орынды «Каримов» демалыс аймағы мен 400 орынды «Falcon Petroleum» ЖШС қолға алған қонақүй кешені жыл соңына дейін өз жұмысын аяқтайды. Үшарал қаласындағы халық игілігіне ашылған әуежай да заман талабына сай. Мұның барлығы да ел игілігіне арналады», – деді өңір басшысы.
«Нұрлы Жол» мемлекеттік бағдарламасы аясында 2015-2017 жылдары Ұлттық қордан 82 жобаға 71,5 млрд. теңге бөлінген. Биыл 22 млрд. теңгеге 49 жоба іске аспақ. Облыста үш ауысымды және төтенше жағдайда тұрған 31 мектептің құрылысы жүргізілуде. Білім күні 23 мектеп ашылса, қалған 8 білім ошағы жыл соңына дейін іске қосылады.
«Пилотты жоба» аясында мүмкіндігі шектеулі жандарға облыс орталығынан аз қабатты тұрғын үй құрылысын жүзеге асыру үшін жергілікті бюджеттен 300 млн. теңге қарастырылған. Баяндамашы мемлекеттік бағдарлама аясында жыл соңына дейін 1496 отбасы пәтер кілтіне, 6457 отбасы жер теліміне ие болады деп атап өтті.
Қазіргі таңдағы ең өзекті мәселенің біріне айналған газдандыру жұмысы 108 елді мекенде іске асырылуда. Елбасы қолдауының нәтижесінде қалаішілік газдандыру құрылысына республика бюджетінен 6 млрд. теңге бөлінсе, облыстық бюджеттен 4,5 млрд. теңге қарастырылған. Сондай-ақ, Талдықорған – Текелі қалаларын газдандыру жұмысына облыстық бюджеттен 1,5 млрд. теңге бөлінді.
Басқосуда Амандық Ғаббасұлы ірі жобаларға, үлескерлер мәселелерін шешу, жылыту маусымына дайындық сынды кешенді жұмыстарға тоқталып, өңір халқының әл-ауқатын көтеру басты міндеттердің бірі екендігін және оған баршаның атсалысуы қажеттігін айтып өтті.
Жиында облыстық ардагерлер ұйымының төрағасы Ермек Келемсейіт, Ақсу ауданы Е. Сиқымов атындағы орта мектептің директоры Рахат Ибраймова, «Шадай батыр» шаруа қожалығының басшысы Жангелді Осан және бірқатар депутат жарыссөзге шығып, облыс әкімі жұмысының оң нәтижелерімен бөлісіп, ұсыныс-пікірлер білдірді. Депутаттар сессия соңында облыс әкімі жұмысына қанағаттанарлық деген баға берді.
Еңлік КЕНЕБАЕВА.
