Қолданысқа берілгеніне 60 жылға жуықтаған Көксу өзені бойындағы бөгет платинасы күрделі жөндеуден өтуде. Бұл мақсатта республикалық қазынадан 515 млн.теңге қаржы қарастырылған.
Көксу ауданды әкімдігі баспасөз қызметінің мәліметінше, платинаның гидротехникалық құрылыс жұмыстары «Жұмыспен қамтудың жол картасы-2020» бағдарламасының аясында жүзеге асуда.
Дәл қазіргі сәтте платина маңын абаттандырып, күрделі жөндеуге дайындап жатыр. Нысан құрылысының қызған шағы қыркүйек айына тұспа-тұс келмек.
Мердігер мекеменің бас инженері Мақсат Садиевтің айтуынша, жаңа бөгет алдыңғысынан әлдеқайда берік және сапалы болады. Тоспаның жалпы ұзындығы 60 метр, биіктігі 6,8 метр. Қоймаға 539 текше метр су сияды.
Стратегиялық маңызды нысан қайта жөндеуден өтіп, іске қосылса, елдің әл-ауқаты жақсарып, жаңа жұмыс орындары да ашылады дейді мамандар.
Кәсіпорын басшысы жаңа су қоймасында жұмыс істейтін мамандардың да жағдайы қарастырылғанын айтып отыр. Бөгеттің басында және төменгі жағындағы су тарату торабында 4 бөлмелі төрт пәтер салынып жатыр. Жалпы бөгеттің жөндеу жұмыстарын 2020 жылдың желтоқсан айында аяқтау көзделген.
«ЖЕТІСУ-АҚПАРАТ»
