Жыл сайын Елорда төрінде ұйымдастырылатын ауылшаруашылығы тауар өндірушілерінің жәрмеңкесі биыл да жалғасты. Игі дәстүр «Хан-шатыр» ойын-сауық орталығының жанында өтіп, қалалықтарды дән риза етті. Шарада саудаланған табиғи өнімдер тұрғындарға қолжетімді бағамен ұсынылды.
Жетісулық ауылшаруашылығы тауар өндірушілерін елордаға облыс әкімінің орынбасары Серік Тұрдалиев бастап барды. Облыс әкімінің орынбасары: «Жылдағы дәстүрге сәйкес Жетісу жерінде өсіріп, өндіргендерімізді Нұр-Сұлтан қаласына әкелдік. Біздің өнімдерімізді жергілікті тұрғындар жақсы біледі әрі асыға күтеді. Күннің күрт суытуына қарамастан сауда қызып жатыр. Тауарлардың бағасы да базардағыдан әлдеқайда төмен»,– деді.
Жәрмеңкеде бетперде тағу, антисептик қолдану сияқты санитарлық-гигиеналық талаптар ерекше сақталды. Базар аумағында ара-қашықтықты ұстану үшін сызықтар сызылып, адамдардың топтасуына жол берілген жоқ. Базаршылар бір бағыттан кіріп, екінші бағыттан шықты.
Сенбілік жәрмеңкені Нұр-Сұлтан қаласының әкімі Алтай Көлгінов бастаған топ аралап көріп, сөреге қойылған өнімдер мен бағасына, сауда мәдениетіне көз жүгіртті. «Әр сенбі сайын еліміздің әр аймағынан келген диқандар өздерінің өсіріп, өндірген өнімдерін қала тұрғындарына саудалайтын болады. Бұл екі жаққа да тиімді. Сондықтан, мұндай шара алдағы уақытта да жалғасады. Ауыл шаруашылығы жәрмеңкелеріне қатысып жүрген облыстардағы әріптестеріме алғысымды білдіремін», – деді Алтай Сейдірұлы.
Айта кетейік, Нұр-Сұлтан қаласында өткен жәрмеңкеге Алматы және Түркістан облыстарының фермерлері қатысты. Екі аймақтан барған шаруалар барлығы 800 тоннадан аса ауыл шаруашылығы өнімдерін жеткізді. Жетісу жерінің он жеті ауданы мен үш қаласынан барғандар да өз әкелгендерін ешбір делдалсыз саудалап қайтты. Бағаны тұрақтандыруға атсалысып жүрген «Жетісу» әлеуметтік корпорациясы да бұдан қалыс қалған жоқ.
– Өткен күзде қалада жәрмеңкелер өткізіліп, оған Қазақстанның барлық облысы қатысты. Бұл жерге әр демалыс сайын келуге тырысамын. Өйткені, елдің әр аймағынан шыққан өнімдер әртүрлілігімен ерекшеленеді. Бағасы да төмен, таңдау да жоғары. Ет, сүттен бастап өрік-мейіз, тәттілерге дейін бар. Іздегеніңнің бәрін табасың. Балғын өнімдердің дәмі де тіл үйіреді. Елге пайдасы бар шара жалғасса деймін, – дейді өз ойымен бөліскен қала тұрғыны Нәзира Сұлтанқызы.
Жергілікті жұртшылықтың көңілінен шығып, мерейлерін тасытқан игілікті істе өнім түрі мол болып, көпшілікті тамсандырды. Жетісулық диқандардың қолынан шыққан алма, алмұрт, жүзімдер де көздің жауын алып, жұртты өзіне қаратты. Дәмі тіл үйірер қауын-қарбыз алушылар да көп болды. Қапшағайдың пиязына, Райымбек ауданынан әкелінген мал еті мен Еңбекшіқазақ ауданынан апарылған сиыр сүтіне кезекке тұрғандар да кешке дейін толастамады. Жетісу жерінің қызыл картобын алушылар да аз болған жоқ. Бал мен балық сатып алғандар да өз ризашылықтарын білдірді. Ұн мен күріш, қантты қап-қабымен сатып алғысы келетіндер де кезекке тұрды. Қой, сиыр, жылқы еттері де сауда сөрелеріне лықа толып, өз алушыларын тапты. Қазы-қарта, жал-жаяға да сұраныс жоғары болды. Талдықорған мен қала маңындағы аудандардағы қайта өңдеу кәсіпорындары шұжық пен сүт өнімдерін және ас атасы – нанның небір дәмдісін ұсынды. Таң бозынан басталған күзгі жәрмеңкеге келушілер түс ауғанша толастамады. Артынып-тартынған елордалықтар керек-жарағын осы жәрмеңке арқылы түгендеп алуға тырысты.
Алыстан жеткен жетісулық диқандар базарлы күннің шырайын келтіріп, елордалықтардың көңіл-күйін серпілтті. Сатушылар да бар ынта-ықыласымен сапалы қызмет көрсетуге тырысты.
Алматы облысының жоғары деңгейде дайындалып келгендеріне көз жеткізген Нұр-Сұлтан қаласының тұрғындары мен қонақтары өз ризашылықтарын білдірді. Осылайша, күзгі шара жоғары деңгейде ұйымдастырылып, көпшіліктің есінде қалатындай өтті.
Жалпы, жетісулық диқандар елордалықтарды азық-түліктің 50-ге жуық түрімен қамтамасыз етті. Жәрмеңкеге барлығы 160 миллион теңгеге 400 тоннаға жуық өнім апарылып, саудаланды. Келесі сенбілік жәрмеңкені Батыс Қазақстан мен Жамбыл облыстары жалғастырып, олар да өздерінің өсіріп, өндіргендерін астаналықтарға ұсынатын болады.
Айгүл БАЙБОСЫНОВА
Нұр-Сұлтан қаласы
Сурет — ғаламтордан
