Жетісу агроөнеркәсіптік кешенінде биыл құны 13,1 миллиард теңге болатын 13 жоба іске асады.
Облыста агроөнеркәсіптік саланы дамыту мақсатында инвестициялық жобалар пулы қалыптастырылды. 2024-2026 жылдары 33 миллиард теңгеден астам сомаға 31 жоба ұсынылды. Атап айтар болсақ, қайта өңдеу, мал шаруашылығын дамыту, жылыжай шаруашылығы, бау-бақша және ылғал үнемдеу технологиялары саласында жобаларды іске асыру жоспарланған.
Облыстық ауылшаруашылық басқармасының мәліметіне сүйенсек, «Ірі жобалар» бағдарламасы аясында 2023 жылы республикалық бюджеттен 2 миллиард теңге бөлінген. Үш тауарлы-сүт фермасы іріктеуден өтіп, кеңейту жүргізуде. Осы жылға бағдарлама шеңберінде 7 миллиард теңге бөлініп, сенім білдірілген агент ретінде «Жетісу» ӘКК анықталды. Бүгінгі таңда ылғал үнемдейтін технологияларды енгізу бойынша 1,8 миллиард теңгеге 3 өтінім қабылданды. Өтінімдерді қабылдау жұмысы жалғасуда. Бөлінген қаражатқа су үнемдеу бойынша 5 жобаны және бордақылау алаңын іске қосу жоспарлануда.
Жыл басынан бері 30,2 мың тонна ет, 87,9 мың тонна сүт, 105,9 миллион дана жұмыртқа өндірілді. Бұдан басқа, өңірде ауылшаруашылығы өнімдерін қайта өңдеу бойынша 122 кәсіпорын жұмыс істейді. Олар 4 айда 22,5 миллиард теңге сомасына тамақ өнімдерін шығарған. Бұл ретте табиғи түрде ет өнімдерін шығару 5%-ға, өсімдік майы 11%-ға, крахмал 56,8%-ға, нан өндірісі 10,2%-ға, ал кондитерлік өнімдер 27,6%-ға ұлғайтылды.
Жетісу облысы әкімінің баспасөз қызметі
