Еліміздің барлық өңірлерінде өскелең ұрпақ арасында қауіпсіздік мәдениетін қалыптастыруға, төтенше жағдайлар кезінде әрекет ету және алғашқы көмек көрсету дағдыларын үйретуге бағытталған «Жас құтқарушы» жарыстары өткізілді, – деп хабарлайды 7-su.kz ақпараттық порталы.
Өңірлік кезеңдердің жеңімпаздары шілде айында өтетін республикалық жас құтқарушылар слетінде өз облыстары мен қалаларының намысын қорғайды.
Астанада өткен қалалық жарысқа мектептердің алты командасы қатысты. Қатысушылар алғашқы медициналық көмек көрсету, авариялық-құтқару жұмыстарын жүргізу, судағы құтқару, өрт эстафетасы және өзге side сайыстар бойынша білімдері мен тәжірибелік дағдыларын көрсетті. Жарыс қорытындысы бойынша №17 мектеп-гимназиясының командасы жеңімпаз атанды. Екінші орынды №13 орта менттеп, ал үшінші орынды №65 мектеп-гимназиясы иеленді. Департаменттің Төтенше жағдайларды жою басқармасының бастығының айтуынша, мұндай жарыстар жасөспірімдердің жауапкершілік сезімін қалыптастырып, адамдарға көмек көрсетуге әрдайым дайын болуға тәрбиелейді.
Шымкент қаласында өткен «Жас құтқарушы» үйірмелерінің қалалық слетіне мектептердің тоғыз үздік командасы қатысты. Бағдарлама төтенше жағдайлар кезіндегі іс-қимылдар, авариялық-құтқару жұмыстарын жүргізу, зардап шеккендерге көмек көрсету және азаматтық қорғау бойынша теориялық және практикалық кезеңдерді қамтыды. Жарыс қорытындысы бойынша №99 мектеп-гимназиясының командасы үздік деп танылды. Екінші орынды №4 «Talant» мектебі, ал үшінші орынды А. Асқаров атындағы №77 мектеп-лицейі иеленді.
Ақтөбе облысында патриоттық тәрбие мен қауіпсіздік дағдыларын ұштастырған жарысқа өңірдің түкпір-түкпірінен келген командалар қатысты. Ауқымды шараға облыстың қалалары мен аудандарынан барлығы 14 команда жиналды. Қатысушылар алғашқы медициналық көмек көрсету, өрт эстафетасы, авариялық-құтқару жұмыстарын жүргізу, қабырға газеттері байқауы және командалық жарыстар бойынша өз білімдері мен дағдыларын көрсетті. Жалпыкомандалық есептің қорытындысы бойынша бірінші орынды Ырғыз ауданының командасы иеленді. Екінші орын Ақтөбе қаласының №1 командасына бұйырса, үшінші орынды Қобда ауданының командасы алды. Жеңімпаздар мен жүлдегерлер дипломдармен және бағалы сыйлықтармен марапатталды.
Шығыс Қазақстан облысында ТЖД спорт манежінің базасында өткен жас құтқарушылар жарысына 100-ге жуық оқушы қатысты. Қатысушылар өрт эстафетасы, алғашқы көмек көрсету және шығармашылық байқауларды қамтыған, шынайы төтенше жағдайларды модельдейтін кезеңдерден өтті. Жарыс қорытындысы бойынша №29 мектептің командасы жеңімпаз атанды. Екінші орынды №36 мектеп, ал үшінші орынды №19 мектеп иеленді.
Қарағанды облысында дәстүрлі «Жас құтқарушы» облыстық жарысына қалалық және аудандық кезеңдердің жеңімпаздары атанған 130-дан астам оқушы қатысты. Қатысушылар тіршілік қауіпсіздігі саласындағы білімдерін, алғашқы көмек көрсету және командада жұмыс істеу дағдыларын көрсетті. Жарыс қорытындысы бойынша бірінші орынды Қарағанды қаласындағы №32 жалпы білім беретін мектептің командасы жеңіп алды. Екінші орын Теміртау қаласының Бірінші классикалық лицейіне бұйырса, үшінші орынды Бұқар жырау ауданындағы Сұлтанмахмұт Торайғыров атындағы тірек мектебінің командасы іеленді.
Қызылорда облысында өткен «Жас құтқарушы» облыстық байқауына жеті командадан 70-ке жуық оқушы қатысты. Мектеп оқушылары өрт эстафетасы, авариялық-құтқару жұмыстарын жүргізу, алғашқы көмек көрсету және шығармашылық байқаулар бойынша сынға түсті. Жарыс қорытындысы бойынша Жалағаш ауданының командасы жеңімпаз атанды. Екінші орынды Қызылорда қаласының командасы, ал үшінші орынды Сырдария ауданының командасы иеленді. Жеңімпаздар өңір намысын республикалық деңгейде қорғау құқығына ие болды.
Жас құтқарушылар жарыстары Төтенше жағдайлар министрлігінің профилактикалық жұмысының маңызды бөлігі болып табылады. Олар мектеп оқушыларына қауіпсіз мінез-құлықтың практикалық дағдыларын меңгеруге, төтенше жағдайларда дұрыс әрекет етуге үйренуге және өз қауіпсіздігі мен айналасындағылардың қауіпсіздігі үшін жауапкершілік сезімін қалыптастыруға мүмкіндік береді. Көптеген қатысушылар болашақта өз өмірін құтқарушы мамандығымен байланыстыру мүмкіндігін қарастыруда.
