Мемлекет басшысының тапсырмасымен ұйымдастырылған «Таза Қазақстан» бағдарламасы аясында Талдықорған қаласында жалғызбасты және қарт адамдарға қайырымдылық көрсету акциясы өтті.
Еріктілер аулалар мен көпшілік жүретін жолдарды қардан тазалап, ардагерлердің қауіпсіздігін қамтамасыз етуге атсалысты. Мұнда «Мейірімді-Жетісу» еріктілер фронт-офисінің жетекшісі Шырай Саматқызы қарттарға көмек көрсету ата-бабамыздан келе жатқан үрдіс екенін айта келіп, еріктілер жастарға үлкен кісілерді құрметтеудің үлгісін көрсететінін жеткізді. Бұл күні жиырма шақты ерікті қарт адамдар мен жалғызбасты аналар үйінің ауласын қардан тазалап, көмек көрсетті. Қыста ауланы қардан тазарту жасы келген адамдар үшін өте ауыр. Осыны ескерген еріктілер үлкен кісілердің аулаларының қарын күреп, кіріп-шығуына жеңілдік туғызды. Акция барысында еріктілер тек қар тазалап қана қоймай, ата-апалармен әңгімелесіп, қандай көмек керек екенін сұрап, өтініштеріне де қолғабыс етті. Алдағы уақытта тағы келетіндерін айтып, басқа да ұсақ-түйек шаруаларын жасап берді. Қазыналы қарттарымыз жас буынның мейірімділік іс-шарасына ризашылықтарын білдірді.
«Мейірімді-Жетісу» волонтерлік фронт-офисінің жетекшісі Шырай Саматқызы: «Бұл игі іс ардагерлер мен жалғызбасты аналардың қауіпсіздігін қамтамасыз етуге бағытталған. Осындай шаралар қоғамдағы мейірімділікті арттырып, бірлік пен жанашырлықты нығайтады», – деді. Көмек алған тұрғындардың бірі зейнеткер София Гвоздикова: «Ауламды қардан тазалау оңай емес. Бүгін еріктілер келіп, барлығын ретке келтіріп берді. Бұл – мен үшін үлкен қуаныш. Қайырымды жандар көп болсын!» , – деп алғысын білдірді.
«Таза Қазақстан» бағдарламасы аясында сенбіліктер мен қайырымдылық акциялары жиі ұйымдастырылып тұратынын айта кетуіміз керек. Игі шара алдағы уақытта да жалғасын табады.
Жанат ҚАЛДЫБАЕВА,
ЖУ-дің гуманитарлық ғылымдар жоғары мектебінің студенті
Суретті түсірген Жұмабай Мұсабеков
