Бүгін еліміздің басым бөлігінде ауа райы құбылмалы болады. Синоптиктердің мәліметінше, солтүстік-батыс циклонының әсерінен ел аумағында жаңбыр жауып, найзағай ойнайды. Кей өңірлерде бұршақ жауып, дауыл соғып, түнгі және таңғы уақытта тұман түсуі мүмкін, – деп хабарлайды 7-su.kz ақпараттық порталы.
Еліміздің батысы мен солтүстігінде қатты жаңбыр күтілсе, оңтүстік және оңтүстік-шығыс аймақтарда шаңды дауыл болады. Республика бойынша желдің күшеюі болжанып отыр.
Бірқатар өңірде жоғары өрт қаупі сақталады. Оның ішінде Жетісу облысының солтүстік бөлігінде жоғары өрт қаупі күтілсе, облыстың оңтүстік және оңтүстік-шығыс аймақтарында төтенше өрт қаупі сақталады.
Мамандар тұрғындарды қауіпсіздік шараларын сақтап, ауа райының өзгерісіне байланысты сақ болуға шақырады.
