Бейсен Құранбек атындағы Журналистер үйінде «Өрт қаупі кезіндегі қауіпсіздік» тақырыбында баспасөз мәслихаты өтті. Онда Жетісу облысы ТЖД мемлекеттік өрт бақылау басқармасының бастығы Сергей Огай өңірдегі жағдайды баяндады. Күннің күрт ысуына байланысты осы айдың 8-10 аралығында 31 өрт тіркелді.
Айтып келмейтін апаттардан сақтану күн тәртібіндегі басты мәселенің бірі. Сондықтан, қай кезде де тілсіз жауға тосқауыл қажет. Осыған байланысты, өрт қауіпсіздігін қамтамасыз ету шеңберінде облыс аумағында орман және дала өртін жою жоспары әзірленіп, бекітілді. Шөптердің жануына далада жатқан шыны, сынық әйнектердің қызуы, өшірілмеген темекі тұқылдары, найзағай, шөп ору жұмыстарына қатыстырылатын тракторлар мен агрегаттардың жарамды шоқ өшіргішпен жабдықталмауы себеп болуы ықтимал, – деді спикер.
Ол табиғи апаттың алдын алу үшін елді мекендерде 798 өрт сөндіру және 2 мыңнан асатын техника бейімделгенін алға тартты. Келесі кезекте БАҚ өкілдерінің сауалдарына жауап берген өңірлік орман шаруашылығы және жануарлар дүниесі аумақтық инспекциясы бөлімінің бас маманы Санат Төлепбеков:
Жеке тұлғалардың орманға баруына қойылған шектеу өз күшін жойған жоқ. Қазір өрт қауіпі кезең болғандықтан бұл тиымды алудың әзірге қажеті жоқ, – деді.
Айта кету керек, табиғат аясында демалушылар мен тұрғындардың қауіпсіздік ережелерін сақтамауы да оқыс оқиғаларға ұрындырады. Сол себепті, мамандар табиғи өрттің алдын алу мақсатында қала тұрғындарын ережелер мен талаптарды қатаң сақтауға шақырады. «Қазақстан Республикасының ормандарындағы өрт қауіпсіздігі» ережесіне сәйкес, жас ағаштар, кесілген ағаш қалдықтары мен дайындалған кеспе ағаштар, шөбі қурап қалған жерлер маңайында от жағуға тыйым салынады.
Мақпал Әділханқызы,
ЖУ-дың 3-курс студенті.
