Бүгін «Әділет» партиясы Жетісу облыстық филиалының конференциясы өтіп, онда өңірлік филиалдың басшылық органдары қалыптастырылды. Конференция барысында облыстық филиалдың төрағасы, Саяси кеңес мүшелері және Бақылау-тексеру комиссиясының құрамы сайланды, – деп хабарлайды 7-su.kz ақпараттық порталы.
Конференцияның күн тәртібіндегі негізгі мәселелердің бірі – Қазақстан Республикасының Президенті Қасым-Жомарт Тоқаевтың «Жаңа Конституция – Жаңа Дәуір» атты үндеуін қолдау болды. Сонымен қатар қатысушылар партияның облыстық филиалының басшылық органдарын қалыптастыру мәселесін қарастырды.
Ашық дауыс беру қорытындысы бойынша «Әділет» партиясы Жетісу облыстық филиалының төрағасы болып Есбай Амангелді Ғабдылкәрімұлы сайланды. Ол мемлекеттік және қоғамдық-саяси салада көп жылдық тәжірибесі бар маман. Жаңа төраға филиал жұмысын үйлестіруге, партияның бағдарламалық мақсаттары мен міндеттерін жүзеге асыруға, сондай-ақ азаматтармен тиімді өзара іс-қимылды қамтамасыз етуге жауапты болады.
Конференция барысында облыстық Саяси кеңестің құрамы да бекітілді. Оның құрамына шағын және орта бизнес, білім беру, ғылым, денсаулық сақтау, мәдениет, спорт, өнеркәсіп, үкіметтік емес ұйымдар және өңірдің әлеуметтік-экономикалық дамуына үлес қосып жүрген өзге де салалардың өкілдері енді. Бұл кеңес өңірдің қоғамдық-саяси өмірінің түрлі бағыттарын қамтып, партия қызметінің тиімді жүзеге асырылуына ықпал етеді.
Сондай-ақ партияның облыстық филиалы жанындағы Бақылау-тексеру комиссиясының құрамы сайланды. Комиссия құрамына экономика, қаржы және бухгалтерлік есеп салаларында тәжірибесі мол мамандар енгізілді. Олар партия қызметінің ашықтығы мен ішкі бақылау тетіктерінің тиімділігін қамтамасыз ету бағытында жұмыс жүргізеді.
Осылайша, «Әділет» партиясының Жетісу облыстық филиалының ұйымдастыру кезеңі толық аяқталды. Алдағы уақытта филиал өңір тұрғындарымен жүйелі жұмыс жүргізуге, партиялық бастамаларды іске асыруға, сарапшылар қауымдастығымен, кәсіпкерлермен және қоғамдық бірлестіктермен ынтымақтастықты нығайтуға басымдық береді.
