Талдықорған қаласының әкімі Ернат Бәзіл Жетісу облысының орталығындағы ең ірі кәсіпорындарының бірі «Қайнар АКБ» ЖШС-нің өндірісін кеңейту жұмысымен танысты.
Қазір аталған өндіріс ошағында көлемді ұлғайтып өнімді арттыруға бағытталған қосымша құрылыс жұмыстары жүргізіліп жатыр. Нысанды толық аралап, ондағы атқарылып жатқан жұмыстарды көзбен көрген шаһар басшысы, зауыттың алдағы жоба-жоспарларына сай қолға алған істеріне сәттілік тілеп, мемлекет тарапынан барынша қолдау көрсетуге әзір екендігін жеткізді.
– Жасалып жатқан жұмыстар осы жылдың екінші тоқсанында аяқталып, жаңа өндіріс орны толық іске қосылады деп жоспарланған. Бұл бастама қосымша тағы 150 жаңа жұмыс орнын ашып, стационарлық аккумуляторлық батареялардың 100 мың данасын шығаруға мол мүмкіндік береді,– дейді кәсіпорын жауаптылары.
Мамандардың мәліметінше, жылына 3 млн дана аккумулятор батареясын өндіріп Қытай, Еуропа, Біріккен Араб Әмірліктері мен Италия сынды шетел нарықтарына дейін шығарып келген «Қайнар АКБ» зауытында осыдан бірнеше жыл бұрын өндіру бойынша жаңа технология іске қосылған болатын. Халықаралық жасыл технологиялар орталығы арасындағы ынтымақтастық туралы меморандум аясында жүзеге асырылған бұл жоба өндірістің өнімділігін арттырып, жұмыс қарқынын тездетті. Сонымен бірге, ол өнім сапасын көтеріп, ескі батареяларды пайдалану мүмкіндіктерін кеңейтті. Аталған технологияның көмегімен аккумулятор корпустарының жаңа үлгілері толығымен қайталама шикізаттан жасалып, итальяндық «ИНЖИТЕК» өндірісінің жаңа заманауи желісінде қайта өңдеуге, басқа да батареялардың жаңа түрін жасап шығаруға мүмкіндік туған. Өйткені, заман талабына сай желі тұтастай жергілікті тазарту сүзгілерімен толық жабдықталған.
Айдын КӘЛІМХАН
