Жазғы демалыс маусымы қызған шақта еліміздің басты туристік орталықтарының бірі – Алакөл көлінің жағалауында ауқымды өзгерістер орын алуда. Жетісу облысына жасаған жұмыс сапары барысында Туризм және спорт вице-министрі Мирас Төлебаев пен облыс әкімінің орынбасары Марлен Көлбаев аймақтағы жаңа нысандардың жұмысымен танысты. Сапар барысында инфрақұрылымды дамыту мен қауіпсіздік шараларын күшейту бағытында атқарылған ауқымды жұмыстар көпшілікке ұсынылды, – деп хабарлайды 7-su.kz ақпараттық порталы.
Өткен кезеңнің көрсеткіштері аймаққа келушілер санының айтарлықтай өскенін дәлелдейді. Мәселен, ішкі туристер саны 382 мың адамға жетіп, өсім 11 пайызды құрады. Ал шетелдік қонақтар легі 60 пайызға артып, 8,2 мың адамға жетті. Қазіргі уақытта жағалауда бір мезетте 21 мыңнан астам демалушыны қабылдай алатын 224 орналастыру орны тұрақты жұмыс істейді. Инфрақұрылымды жақсарту мақсатында электрмен жабдықтау нысандарының құрылысы толық аяқталып, Ақши ауылында кәріз жүйелері мен тазарту құрылыстары салынуда. Сонымен қатар Лепсі теміржол станциясында жаңа вокзалдың құрылысы қарқынды жүргізіліп жатыр.
Демалушылардың қауіпсіздігі мен санитарлық тазалығы басты назарда тұр. Жағалауда қоқыс контейнерлері, санитарлық тораптар мен киім ауыстыру кабиналары орнатылды. Азаматтардың өмірін қорғау үшін 40 құтқару мұнарасы, ұзындығы 13 шақырым болатын қалқыма белгілер желісі және 7 пирс қызмет көрсетеді. Қоғамдық тәртіпті сақтау мақсатында полиция қызметкерлері күшейтілген режимде жұмыс істеп, маусым басталғалы бері 150-ден астам профилактикалық рейд ұйымдастырды. Судағы қауіпсіздікті қамтамасыз ету бағытында құтқарушылар тәулік бойы кезекшілік атқаруда.
Мемлекет тарапынан туризм саласын дамытуға бағытталған шаралар өз нәтижесін беруде. Жағалау сызығын сақтап қалу үшін арнайы қорғаныс бөгетін салу туралы қабылданған шешім өңірдің экологиялық тұрақтылығын қамтамасыз етуге бағытталған. Тұрғындар мен туристер үшін жайлы жағдай жасау жұмыстары алдағы уақытта да жалғасын таппақ. Әрбір саяхатшы қауіпсіз әрі мазмұнды демалыстың игілігін көре алады.
