Қазақстанның үш өңірінде, соның ішінде Жетісу облысында ойын бизнесі нысандарын орналастыруға арналған арнайы аумақтар белгіленді, – деп хабарлайды 7-su.kz ақпараттық порталы Kapital.kz сайтына сілтеме жасап.
Елімізде туристік инфрақұрылымды өркендету мен өңірлердің экономикалық әлеуетін арттыру мақсатында жаңа шешімдер қабылдануда. Осы орайда Жетісу, Шығыс Қазақстан және Маңғыстау облыстарының әкімдіктері казино, ойын автоматтары залдарын, букмекерлік кеңселер мен тотализаторларды орналастыруға болатын жер телімдерін ресми түрде бекітті. Бұл бастама өңірге шетелдік инвестиция тартуға әрі жергілікті бюджетті толықтыруға септігін тигізеді.
Жетісу облысы әкімдігінің қаулысына сәйкес, тиісті аумақ Алакөл ауданындағы Ақшы ауылы жағынан, Алакөл көлінің жағалауынан бөлінген. Құжат осы аумақта казинолар мен өзге де ойын бизнесі нысандарын орналастыру мүмкіндігін қарастырады. Дәл осындай шешімдер Шығыс Қазақстан облысының Марқакөл ауданында және Маңғыстау облысында Каспий теңізінің жағалауында қабылданған. Ресми шешімдер «Ойын бизнесі туралы» Қазақстан Республикасы Заңының талаптарына негізделген.
Арнайы жер телімдерінің белгіленуі бұл аумақтарда бірден казино құрылысы басталады дегенді білдірмейді. Бұл – тек заңнамаға сәйкес мұндай нысандарды орналастыруға рұқсат етілген шекараларды айқындау. Негізгі мақсат – ойын зораларын тек шетелдік туристерге арналған форматта дамыту мүмкіндігін зерттеу. Халықаралық тәжірибе көрсеткендей, тек шетелдіктерге қызмет көрсететін орындар жергілікті тұрғындардың әлеуметтік жағдайына кері әсер етпей, курорттық инфрақұрылымды өркендетудің қосымша драйверіне айналады.
Сарапшылардың пікірінше, Алакөл жағалауында заманауи демалыс пен ойын-сауық кешендерінің пайда болуы маусымдық шектеулерді еңсеруге жол ашады. Тұрақты туристер ағыны өңірде жаңа жұмыс орындарын құруға, қызмет көрсету сапасын көтеруге және көлік логистикасын жақсартуға ықпал етеді. Ең бастысы, мұндай жобалар ел азаматтарының құмар ойындарға тәуелділігін арттырмай, тек сыртқы туризмнен түсетін табысты еселеуді көздейді.
Алакөл шипажайлық аймағын одан әрі көркейту мен туристік инфрақұрылымды жаңғырту – Жетісу өңірінің бәсекеге қабілеттілігін арттыратын маңызды қадам. Жобаны сауатты іске асыру аймақ экономикасына жаңа серпін береді.
