Алакөл ауданының Ақши ауылында су айдындарындағы демалушылардың қауіпсіздігі мен қоғамдық тәртіпті сақтау мәселелеріне арналған кезекті рейдтік жиын өтті, – деп хабарлайды 7-su.kz ақпараттық порталы.
Алакөл жағалауында өткен маңызды кеңеске Қазақстан Республикасы Төтенше жағдайлар вице-министрі, генерал-майор Рамиль Камалов, Алакөл ауданының әкімі Алмас Абдинов, Жетісу облыстық ТЖД басшылығы, прокуратура мен полиция өкілдері, сонымен бірге су көліктерінің иелері қатысты.
Басқосуда 2026 жылдың 1-ші шілдесінен бастап шағын көлемді кемелерді мемлекеттік тексеру және қадағалау міндеті ҚР Көлік министрлігінен Төтенше жағдайлар министрлігінің құзыретіне ресми түрде берілгені белгілі болды. Осыған орай, демалыс аймағындағы заң талаптарының орындалуын қадағалау және рейдтік шараларды жүйелі жүргізу басты орынға шықты.
Жиын барысында қайықтар мен шағын кемелердің қозғалысын реттеу, су көліктерін тиісті тіркеуден өткізу, құтқару кеудешелерін міндетті түрде пайдалану жайы қатал ескертілді. Адамдар жиі шомылатын аймақтарға қайықпен жақын жүзуге тыйым салынады.
Аудан әкімі Алмас Абдинов Алакөлдің еліміздегі ең ірі туристік орталықтардың бірі екенін атап өтіп, туристердің амандығы мен экологиялық талаптардың сақталуы кәсіпкерлер мен жауапты мекемелерге ортақ міндет екенін түсіндірді.
«Шомылу маусымы басталғалы бері қауіпсіздік қағидаларын бұзған тұлғаларға әкімшілік хаттамалар толтырылды. Соңғы күндері Алакөлде қайықтан адамдардың ауыр жарақат алу оқиғалары тіркелді. Мұндай қайғылы жағдайларға жол бермес үшін бақылау шаралары еселеп күшейтіледі», – деп хабарлады Жетісу облыстық ТЖД өкілдері.
Судағы демалыстың қуанышы қайғыға айналмас үшін қайық иелері мен демалушылар қарапайым қауіпсіздік ережелерін берік ұстануы қажет. Мемлекеттік органдар тарапынан жүргізілетін рейдтер мен реттеу шаралары жазалауды емес, жазатайым оқиғалардың алдын алуды көздейді.
