Мемлекет басшысы Қасым-Жомарт Тоқаев Алатау қаласы бойынша жаңа заң құжатына қол қойды, – деп хабарлайды 7-su.kz ақпараттық порталы. Осы тарихи шешім аясында өңірде «Алатау резиденті» мәртебесі енгізіліп, Smart City Қазақстан бағытындағы ауқымды жобалар іске асырылады.
«Алатау қаласының арнайы құқықтық режимі туралы» Қазақстан Республикасының Конституциялық заңы аймақтың экономикалық әлеуетін түбегейлі өзгертуді көздейді. Аталған құжаттың басқа қалалардан айырмашылығы – мұнда басқарудың мүлдем соны, икемді үлгісі енгізіледі.
Серпінді даму жоспары мынадай маңызды салаларды қамтиды:
- Инновация мен инвестиция: Шетелдік және отандық ірі компанияларға салықтық және кедендік жеңілдіктер ұсынылады. Алдын ала болжамдар бойынша, инфрақұрылымды дамытуға 2 млрд доллардан астам инвестиция тартылмақ.
- Кәсіпкерлікті қолдау: Жеке және заңды тұлғаларға арналған әкімшілік кедергілер барынша азайтылады.
- Әлеуметтік және инфрақұрылымдық даму: Қала құрылысы, экология, мәдениет пен спорт салалары заманауи талаптарға сай қайта құрылады.
Жаңа заңнамалық актінің ең басты ерекшелігі – «Алатау резиденті» құқықтық мәртебесінің енгізілуі. Осы ерекше мәртебені қала әкімшілігі белгілі бір талаптарға сай келетін кәсіпкерлер мен инвесторларға береді. Арнайы режимді қолдану көлемі, құқықтар мен міндеттер нақ осы мәртебе арқылы реттеледі. Мұндай қадам бизнестің заңды әрі қауіпсіз жұмыс істеуіне берілетін үлкен кепілдік саналады.
Бұған дейін Мемлекет басшысы өңірдегі электр қуатының жиі өшуін, интернет пен сапалы жолдардың жоқтығын қатаң сынға алған болатын. Жаңа заң нақ осы қордаланған мәселелерді шешудің нақты құралына айналмақ.
Шаһардың қауіпсіздігі мен тиімді жұмыс істеуі үшін барлық деректер қалалық кеңістікті басқарудың бірыңғай цифрлық платформасына біріктіріледі. Тұрғындар үшін цифрлық сауаттылықты арттыруға мүмкіндік беретін осы заманауи жүйе коммуналдық қызметтердің сапасын бақылауға және қауіпсіздікті 100-пайыз қамтамасыз етуге септігін тигізеді.
«Жедел дамитын цифрлық мегаполистерді, инновациялық кластерлерді және жоғары өнімді индустрияларды құру Қазақстанды Еуразиядағы жоғары технологиялық әрі іскерлік хабқа айналдыруға бағытталған», – деп атап өтті Қасым-Жомарт Тоқаев.
Ұзақ мерзімді даму стратегиясы аясында қала дизайны, жасыл желектерді сақтау және қоршаған ортаны қорғау мәселелері де басты назарда болады. Сапалы инфрақұрылым 50-60 мың жаңа жұмыс орнын ашуға жол ашпақ.
