13-21 қыркүйек аралығында Хорватия астанасы Загреб қаласында күрес түрлерінен ересектер арасындағы әлем чемпионаты өтті. Биылғы дода алғаш рет Хорватияда ұйымдастырылып, еркін күрес, грек-рим және әйелдер күресінен 30 медаль жиынтығы сарапқа салынды. Жарысқа 76 елден 776 балуан қатысып, Қазақстан атынан 29 спортшы бозкілемге шықты, – деп хабарлайды 7-su.kz ақпараттық порталы.
Еркін күрестегі қос қола
Қазақстан сапынан 61 келідегі Асылжан Есенгелді мен әлем чемпионы Нұрқожа Қайпанов қола жүлдеге ие болды.
Жалпы еркін күресте жерлестеріміз 25 белдесу өткізіп (14 жеңіс, 11 жеңіліс), лайықты өнер көрсетті. Ал сенім артқан Ризабек Айтмұхан жарыстың алғашқы айналымында сүрінді.
Әйелдер күресінде жеңіс аз болды
Әйелдер құрамасы Загребтегі бәсекеде барлығы 10 белдесу өткізіп, тек бірінде ғана жеңіске жетті. 59 келідегі Виктория Хусаинова алғашқы айналымда мексикалық қарсыласынан басым түсті.
Ал көпшілік үміт артқан Жәмила Бақбергенова мен Эльмира Сыздықова жүлдесіз қалды. Құрама бас бапкері Қайрат Сағадиевтің айтуынша, психологиялық дайындық пен тәжірибенің аздығы негізгі себеп болған.
Грек-рим күресіндегі тарихи алтын
Қазақстан үшін басты сенсацияны 60 келіде сынға түскен Айдос Сұлтанғали жасады. Ол финалда мерзімінен бұрын жеңіске жетіп, 26 жылдан кейін грек-рим күресінен елімізге әлем чемпионы атағын сыйлады.
Бұл — Қазақстан тарихындағы алтыншы әлемдік «алтын». Бұған дейін:
-
1999 жылы – Мхитар Манукян (63 келі)
-
1998 жылы – Мхитар Манукян (63 келі), Бақтияр Байсейітов (76 келі)
-
1997 жылы – Юрий Мельниченко (58 келі)
-
1994 жылы – Юрий Мельниченко (57 келі) жеңіске жеткен еді.
Жүлде дәстүрі жалғасуда
Осылайша, қазақстандық балуандар қатарынан үшінші жыл әлем чемпионатынан алтынсыз оралмай отыр. 2023 жылы Сербияда Ризабек Айтмұхан, 2024 жылы Сербияда Нұрқожа Қайпанов жеңіс тұғырынан көрінсе, биыл кезек Айдос Сұлтанғалиға тиді.
Келесі әлем чемпионаты 2026 жылдың 5-13 қыркүйегінде Бахрейннің Манама қаласында өтеді.
