ҚР Бәсекелестікті қорғау және дамыту агенттігінің Алматы облысы бойынша департаменті жүргізген талдау нәтижесі бойынша «Азаматтарға арналған үкімет» КЕАҚ Алматы облысы бойынша филиалы, сондай-ақ, Райымбек және Балқаш аудандарының білім бөлімі тарапынан монополияға қарсы органның келісімінсіз екі балабақша құру және тіркеу бойынша заңбұзушылықтар анықталды. Бұл туралы «Жетісу» газеті аталған департаменттің баспасөз қызметіне сілтеме жасап хабарлады.
Аталған заңбұзушылық Қазақстан Республикасы Кәсіпкерлік кодексінің 192-бабында көрсетілген талаптарды орындамаудан туындаған. Заң нормаларына сәйкес, заңды тұлғаны тіркеудің күшін жою, сол сияқты оны тарату заңды күшіне енген сот шешімінің негізінде ғана жүргізіледі. Осыған байланысты аталмыш департамент «Азаматтарға арналған үкімет» МК КЕАҚ Алматы облысы бойынша филиалы әрекетін заңсыз деп тану және балабақшаларды мемлекеттік тіркеудің күшін жою туралы сотқа талап-арыз берді.
Алматы облысының мамандандырылған ауданаралық экономикалық сотының шешімімен департаменттің талап-арызы толық көлемде қанағаттандырылып, жоғарыда көрсетілген мемлекеттік мекемелердің мемлекеттік тіркеуінің күші жойылды.
«ЖЕТІСУ-АҚПАРАТ»
Сурет ғаламтордан алынды
