Қазақстанда ұстаздарға жасанды интеллектті оқу процесіне тиімді енгізуге бағытталған «Ustazga AI» бірлескен жобасы басталды. Бастаманы «AMANAT» партиясы мен Қазақстан Республикасының Оқу-ағарту министрлігі бірлесе жүзеге асыруда.
Жоба Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауында берілген тапсырмаларды орындауға бағытталған.
Осы бағыттағы нақты қадам ретінде биылғы «Mұғалім Talks» кейс-платформасында ҚР Парламенті Мәжілісінің және «AMANAT» партиясының Төрағасы Ерлан Қошанов мұғалімдерге арналған Daryn.ai платформасының іске қосылғанын жариялады.
Жобаның басты мақсаты – педагогтерді жасанды интеллект технологияларын тиімді әрі жауапты қолдануға үйрету, олардың жұмыс жүктемесін азайтып, оқыту сапасын арттыру. Сонымен қатар, бағдарлама цифрландыру мен білім беруде тең мүмкіндіктерді қамтамасыз етуге бағытталған.
Қазіргі таңда жоба аясында Талдықорған қаласында «Daryn Ustaz» онлайн оқыту курстары басталды. Үш деңгейлі тегін бағдарлама ұстаздарға жасанды интеллект құралдарын оқу процесіне енгізіп, уақытты үнемдеуге және оқыту сапасын жақсартуға мүмкіндік береді.
«Ustazga AI» жобасы үш негізгі кезеңнен тұрады: Тегін онлайн курс. Барлық қазақстандық мұғалімдерге арналған «Жасанды интеллект педагогтың көмекшісі ретінде» атты тегін онлайн курс Daryn.ai платформасында
– Педагогикалық хакатон. Онлайн оқуды аяқтаған мұғалімдер арасынан үздік 400 педагог іріктеліп, «Мұғалім AMANAT» хакатонына қатысады. Бұл кезеңде ұстаздар «Мектепке арналған ЖИ шешімі» тақырыбында өз жобаларын қорғайды. Ең үздік 20 мұғалім халықаралық тағылымдамаға жолдама алады.
– Халықаралық тағылымдама. Хакатон жеңімпаздары 2026 жылдың маусым айында Оңтүстік Кореяда өтетін 7 күндік тағылымдамаға қатысып, білім беру саласындағы ЖИ технологияларын енгізудің үздік тәжірибесін зерделейді.
«Daryn Ustaz» педагогтердің кәсіби біліктілігін арттыру орталығының директоры Ерлан Әуелбекұлының айтуынша, бұл жоба педагогтердің кәсіби деңгейін жаңа сатыға көтеріп, білім беру жүйесін технологиялық тұрғыда жетілдіруге мүмкіндік береді. «Жасанды интеллект – ұстаздың орнын баспайды, керісінше, оның ең сенімді көмекшісіне айналады. “Ustazga AI” жобасы арқылы мұғалімдер жаңа технологияны өз жұмысына тиімді қолдануды үйреніп, оқушылардың білім сапасын арттыра алады», – деді ол.
Жоба еліміздің барлық өңірінде кезең-кезеңімен жүзеге асырылады. «AMANAT» партиясы мен Оқу-ағарту министрлігі білім беру саласын цифрландыру және заманауи технологияларды енгізу бағытындағы ынтымақтастықты одан әрі кеңейтуді жоспарлап отыр.
