Алматы облысынан бөлініп шыққан Жетісу облысының жаңа тарихы мәдениет пен руханиятты қайта түлетудің кезеңі. Әкімшілік құрылым жаңарған сайын өңірдің рухани болмысы да өз таңбасын іздейді. Осы тұрғыдан алғанда Жетісу облыстық филармониясына Дәнеш Рақышевтің аты берілуі кездейсоқ шешім емес, тарихи әділдіктің орнауы десек, артық айтпаймыз.
Дәнеш Рақышев тек әнші емес, қазақ өнерінің, Жетісу ән мектебінің дара тұлғасы. Оның орындауындағы әр ән – ел мен жерге деген сүйіспеншіліктің үні, ұлт болмысының айнасы.
Жетісудың мәдени келбетін айқындап, ұлттық өнердің рухын асқақтатқан филармония сахнадағы әрбір сәтін ел руханиятына арнаған, өнердің ыстығына күйіп, суығына тоңған жандардың ордасы.
Рухани ордадағы шығармашылық ұжымы тұтас бір мектеп, өнер мен руханияттың тірі шежіресі. Әрбір мүшесі өз ісінің шебері, ел мәдениетінің елшісі. Олар тек концерт қойып қана қоймай, халықтың көңілін баурап, ұлттық рухты жаңғыртып келеді.
Ұжымда домбыра мен қобыздың, сырнай мен жетігеннің үнін Мұқан Төлебаев атындағы қазақ халық аспаптары оркестрі үйлестірсе, заманауи музыканың тынысын сездіріп, ұлттық сахнаны жаңа ырғақтармен байытып жүрген «Құрмет» орденінің иегері, Қазақстан Композиторлар одағының мүшесі композитор Әли Алпысбаев жетекшілік ететін эстрада-симфониялық оркестрі мен үрмелі аспаптар ансамблі. Мың түрлі қимылы арқылы тарих пен табиғатты сөйлете алатын бишілер тобының еңбегі де ерекше. Оларды өңірдегі барлық мерекелік шараның сәні мен салтанаты деуге болады. Ал қайсыбір әншісін алмайық, сахнада ғана емес, ел ішінде де мәдениет елшісіне айналған.
Маусымашар кеште ұлы тұлғаның рухы сезілгендей болды. Өнерпаздардың жүректен шыққан әрбір әуені Дәнеш салған дәстүрдің үзілмегенін, қайта жаңғырып, жаңа бояумен толысып келе жатқанын паш етті.
Сахна төрінде киелі өнер мектебінен нәр алған таланттар, ән дәстүрін жалғаған дарынды ұрпақ өнер көрсетті. Эстрада әншілері, вокалдық топтар, би ансамблі мен симфониялық оркестр музыканттары барлығы да өз өнерімен көрермен жүрегін тербетті. Заманауи ырғақ пен ұлттық нақыш үйлесім тапқан кеш әр тыңдарманды ерекше әсерге бөледі. Ән мен күйдің, би мен поэзияның үндестігі қазақ мәдениетінің мәңгілік мәнін тағы бір дәлелдегендей.
Филармонияның жаңа маусымы тың идеяларға, жас таланттарға, ұлттық өнердің жаңа тынысына жол ашты. Кеш шымылдығы көрерменге рухани серпіліс сыйлаған әсерлі композициялармен ашылды. Концерт барысында заманауи және ұлттық нақыштағы музыкалық қойылымдар қойылып, жанды дауыс пен шынайы эмоция көрермен көңілін сүйіндірді. Филармониядағы алдыңғы толқын, орта буын, кейінгі жастардың әрқайсысы жеке-жеке насихаттауға тұратын хас таланттар. Бүгінгі мақаламызда өнер ұжымына жалпылай баға беріп, алдағы маусымның да жемісті өтуіне тілегімізді білдіреміз.
Дәнеш Рақышев атындағы филармонияның әрбір маусымы – талантты әншінің мәңгі өшпес үнімен, ұлттық өнерге деген құрметпен үндес. Ал бұл ашылу кеші – сол рухтың жалғасы, қазақтың асқақ мәдениетінің жаңғыру нышаны болды.
Филармония әртістері Мысыр Араб Республикасының астанасы Каир қаласында өткен «Citadel Festival» халықаралық іс-шарасында өнер көрсетті.
«Жетісу» бишілер ансамблі республикалық «TURAN DANCE» байқауында «Халық биі» жанры бойынша бас жүлдегер атанды.
«Жетісу сазы» фольклорлы-этнографиялық ансамблі композитор, дирижер, КСРО Халық әртісі Н. Тілендиевтің 100 жылдығына арналған «Құстар әні» республикалық фестиваліне қатысып, дипломант атанды.
Медет ЖҰМАБАЙ
