Қазақстанда «Россия сегодня» медиа тобының өкілдігі болып табылатын Sputnik Қазақстан ақпарат агенттігінің қызметіне шектеу қою мүмкіндігі талқылануда.
Бұл мәселе белгілі журналист және құқық қорғаушы Лұқпан Ахмедьяров тарапынан ресейлік бұқаралық ақпарат құралдарының қазақстандық медиа кеңістігінде Украинадағы соғысқа қатысты насихат жүргізуі мүмкін екендігі туралы мәлімдемеден кейін көтерілді.
Аталған жағдай бойынша Мәдениет және ақпарат министрі Аида Балаева Үкімет отырысында түсініктеме берді.
«Құқықтық тұрғыдан бұл мәселені жан-жақты қарастырамыз. Расында, бұлай болмауы керек. Сондықтан Sputnik агенттігіне ескерту жібереміз. Sputnik – шетелдік БАҚ. Бұл мәселені тиісті заң мамандарымен талқылаймыз. Осыдан кейін министрлік заң аясында қажетті шараларды қабылдайды», – деп атап өтті министр.
Министрлік бұл мәселені ақпараттық қауіпсіздік және мемлекеттік ақпараттық саясатты қорғау тұрғысынан қарастырып отыр. Қазіргі таңда тиісті заң сарапшылары жағдайды зерделеу үстінде, және заң аясында нақты шешімдер қабылданатыны мәлімделді.
Дереккөз: stan.kz
Фото: Русский мир
