«Информатика» пәнінің мұғалімі атану мен үшін үлкен жетістік. Өзім арман еткен ұстаздық жолға түскеніме іштей қатты қуандым. Еңбек жолымды талай жанның қара шаңырағына айналған, тарихы терең білім ордасынанбастағаныма дән ризамын.
Білім ошағының басшысы да, әріптестерім де жылы шыраймен қарсы алды. Олар әлі күнге өздерінің тәжірибесімен бөлісуден танбай келеді. Баламен жұмыс істеу оңай емес. Дегенмен, сені демеп тұратын жандардың бары үнемі біздей жас мамандарды жігерлендіреді.
Басында қорқыныш сезімі басым болды. Бірақ компьютерге, жаңа технологияларға қызығушылығымның басымдығынан тайсала қойған жоқпын.
Балалардың көзіндегі «үйренсем» деген құштарлықты көргенде бәрі өзгеріп сала берді. Көңілдегі үрей бұлты сейілді. Жұмысқа кіріскен сәттен бастап жас мамандарға арналған «Педагогикалық дебют», «Педагогикалық тандем» сынды байқауларға қатысып жүлделі орындар алып, өзіме деген сенімділікті арттырдым.
Таңертең мектепке ерте келемін. Сабаққа дайындаламын, компьютерлерді тексеремін. Сабақ барысында балаларға тапсырманы бір-бірлеп түсіндіремін, жұмысын қарап, көмектесемін. Мұғалімнің күні өте қарбалас өтеді. Бір сыныптан екінші сыныпқа жүгіріп жүреміз. Сабақ арасында оқушылардың: «Апай, мына жерін түсінбей қалдым», «Апай, компьютер ашылмай тұр» деп келіп тұратыны жұмыстың ең қызық, ең тәтті сәттері.
Әр бала технологияны әртүрлі қабылдайды. Біреуі тез түсінеді, бірі баяу. Оларға тек дұрыс бағыт берсе, бәрі үйренетініне аз уақытта көзім жетті.
Сабақтарды толық интерактивті ету, жаңа әдістер енгізу, білімімді жетілдіруді мақсат етіп қойдым. Информатика күн сайын өзгеретін сала, сондықтан ұстаз да әрдайым жаңарып отыруы керек.
Қазіргі заман толық цифрландыру дәуірі. Компьютерлік сауаттылық кез келген мамандық үшін қажет. Мен үшін басты мақсат – балаларға тек бағдарламаны үйрету емес, логикалық ойлау, іздену, шешім табу дағдыларын қалыптастыру.
Айгүл МУХАМЕДЧИНОВА,
информатика пәнінің мұғалімі
