Облыстық тексеру комиссиясының кезекті отырысы өтіп, жергілікті бюджетке түсетін салықтар мен бюджетке төленетін басқа да міндетті төлемдердің толық әрі уақытылы түсу тиімділігіне жүргізілген мемлекеттік аудит нәтижелері талқыланды.
Аудит «Қазақстан Республикасы Қаржы министрлігінің Мемлекеттік кірістер комитеті, Жетісу облыстық мемлекеттік кірістер департаменті Ескелді аудандық мемлекеттік кірістер басқармасы» республикалық мемлекеттік мекемесінде жүргізіліп, 2024 жылғы қаңтардан 2025 жылғы желтоқсанға дейінгі кезең қамтылды.
Тексеру нәтижесінде жалпы сомасы 3 млн. 468 мың теңгені құрайтын қаржылық бұзушылықтар анықталды. Оның ішінде 1 млн. 337,5 мың теңге аудандық бюджетке өндірілген. Сонымен қатар, 8 рәсімдік бұзушылық тіркелді.
Жиын барысында бюджетке салықтар мен басқа да міндетті төлемдердің толық әрі уақытылы түсуін қамтамасыз ету және салықтық бақылауды жүзеге асыру бағытында бірқатар кемшіліктің бар екені көрсетілді. Атап айтқанда, бюджет түсімдерін болжау әдістемесінің сақталмауы, салықтық және салықтық емес түсімдерді жоспарлау кезінде артық болжамдарға жол берілуі, көлік құралдары салығы бойынша берешектердің өсуі, салық декларацияларын уақытылы тапсырмау фактілері және мүлік салығын толық өндіру бағытындағы олқылықтар анықталды.
Отырыс қорытындысында тексеру комиссиясының тиісті қаулысы қабылданып, анықталған кемшіліктерді жою және олардың қайталануына жол бермеу мақсатында аудит объектілеріне нақты тапсырмалар берілді.
Айгүл БАЙБОСЫНОВА
