Қазақстан Үкіметі әскери қызметшілерге берілетін ақшалай өтемақы мен тұрғын үй төлемдеріне қатысты маңызды құжатқа түзетулер енгізді. Жаңа ережелер әскерилердің баспана мәселесін шешу тетіктерін нақтылап, төлем алу процесін реттейді, – деп хабарлайды 7-su.kz ақпараттық порталы.
2026 жылғы 8 мамырдағы Үкімет қаулысына сәйкес, ақшалай өтемақы – бұл заңда қарастырылған жағдайларда берілетін біржолғы тұрғын үй төлемі. Бұл қолдауды алуға құқылы азаматтардың санаты нақтыланды. Олар:
- 2013 жылғы 1 қаңтардағы мәлімет бойынша 10 жыл және одан да көп әскери өтілі бар азаматтар;
- 20 жыл күнтізбелік қызметтен кейін қызметтік баспананы тегін жекешелендіруге құқығы бар тұлғалар;
- Жекешелендіруге жатпайтын қызметтік үйлерде тұрып жатқан әскерилер.
Төлем мөлшері қалай есептеледі? Бұл үшін еліміз бойынша жаңа баспананың бір шаршы метрінің құны (статистикалық деректер негізінде) отбасының әр мүшесіне тиесілі 18 шаршы метрге көбейтіледі. Содан кейін одан бұрын алынған ағымдағы тұрғын үй төлемдерінің сомасы алынып тасталады.
Өтемақыны рәсімдеу үшін алушы тиісті мекеменің кадр бөлімінен анықтама ұсынуы тиіс. Онда әскери қызметтегі мәртебесі, отбасы құрамы мен бұған дейінгі төлемдер туралы ақпарат қамтылуы шарт. Егер жұбайы да құқық қорғау немесе арнаулы органдарда қызмет етсе, оның да төлемдерді алған-алмағаны туралы мәліметі талап етіледі.
Мемлекеттік қолдаудың бұл түрі барлық әскериге бірдей беріле бермейді. Төлем төленбейтін жағдайлар:
- Меншік құқығында баспанасы барлар (50%-дан аз немесе мұралық үлесті қоспағанда);
- Бұрын баспананы жекешелендіру құқығын пайдаланғандар;
- Соңғы 5 жыл ішінде өз атындағы үйін сатып немесе сыйға тартып жібергендер.
Ақшалай өтемақы мақсатты сипатқа ие. Бұл дегеніміз – бөлінген қаражат тек баспана мәселесін шешуге жұмсалуы керек. Төлем бұйрық шыққан соң 1 ай ішінде алушының арнайы шотына аударылады. Ал алушы 6 ай ішінде ақшаның мақсатты жұмсалғанын растайтын құжаттарды өткізуге міндетті.
Жаңа қаулы 2026 жылғы 19 мамырдан бастап ресми түрде қолданысқа енеді. Бұл өзгерістер әскерилердің әлеуметтік жағдайын жақсартуға және баспана кезегін тиімді реттеуге мүмкіндік береді. Егер сіз осы санатқа жатсаңыз, құжаттарыңызды ертерек түгендеп, жаңа ережелермен таныс болғаныңыз абзал.
