ҰҚК ШҚ Алакөл ауданы бойынша Шекара басқармасының Кәсіптік және техникалық дайындық бөлімінде ерекше форматтағы шара өтті.
«Әскер ата-ана көзімен» атты шараға сарбаздардың ата-аналары шақыртылып, балаларының әскердегі өмірімен танысуға мүмкіндік алды.
Жиынның мақсаты – сарбаздың жағдайын көрсету, олардың күнделікті дайындығы туралы толық ақпарат беру, сондай-ақ әскер мен отбасы арасындағы байланысты нығайту.
Ата-аналар алдымен әскери бөлім аумағын аралап, жас жауынгерлердің жатын орынын, казарманы, оқу сыныптарын және оқу-материалдық базаны көрді. Сарбаздардың күнделікті тәртібі, оқу-жаттығу процесі және әскери бөлімнің мүмкіндігі жайлы жан-жақты мәлімет алды.
Кездесуде әскери асханада түскі ас ішіп, жауынгерлерге берілетін ас мәзірімен танысты. Бұл күн ата-аналарға ерекше әсер қалдырды.
Бағдарламаның ерекшелігі – атыс дайындығы алаңына бару болды. Қонақтар оқ атудағы қауіпсіздік ережелері, әскери дайындықтың өткізілу тәртібі туралы түсінік алып, сарбаздардың шеберлігі мен жинақылығына жоғары баға берді.
Соңында ата-аналар сұрақтарын еркін форматта қойып, сарбаздармен және әскери бөлім басшылығымен ашық пікір алмасты.
«Жетісу-Ақпарат»
