Кішкентай кезімнен бастап ата-анам менің білім алуыма қатты көңіл бөлді. Отбасымыз түгелдей дерлік математика пәнін жақсы көреді, өмірлерінің бөлшегі санайды. Есеп шығару қабілетіміз бен логикалық ой жүйріктігіміз бізді басқалардан ерекше етіп тұрады. Осындай қасиетті атам менің бойымнан да байқаған екен.
Маған шахмат ойнауды атам Нұрмолда үйретіп, ойынның құпия сырын менімен бөліскен-тұғын. Оның көрсеткен әдіс-тәсілдерін санама тез тоқып алуға тырысамын. Мен математика сабағын асыға күтемін. Өзімді сыныптастарымның арасындағы есеп шығарудан үздік оқушылардың бірімін деп санаймын. Кейде қызықты, логикалық есептер болса, басқалардан бірінші болып шығаруға күш саламын. Меніңше, математика мен шахмат арасында үлкен байланыс бар. Шахматсыз математика, математикасыз шахмат болмайды. Себебі, математика арқылы шахматты, шахмат арқылы математиканы жылдам меңгеруге болады.
Бұл ойын ойлануды, есеппен әрекет етуді үйретеді. Бірінші жүрген жүрісің келесі тасыңның жүруіне ықпал жасайды. Сондықтан шахмат алдын ала ойлануды қажет етеді.
Биыл біздің мектебімізде шахмат үйірмесі ашылды. Атам үйреткен шахматтың қыр-сырын мектепте үлкен тәжірибелермен жалғастырып жатырмын. Мектептегі үйірмеге көп балалар барып жүр, соның арқасында бос уақытымызды шахмат ойнауға арнаймыз.
Елхан НҰРЛАНҰЛЫ,
Нұрым орта мектебінің 4-сынып оқушысы
Нұрым ауылы
